ଭୁବନେଶ୍ୱର: ଆଜି ପ୍ରଥମ ଥର ପାଇଁ ଢେଙ୍କାନାଳ ଜିଲ୍ଲାର ୪ ଜଣ କରୋନା ଆରୋଗ୍ୟ ପ୍ଲାଜ୍ମା ଦାନ କରିଛନ୍ତି । ଏମାନେ ହେଲେ ପ୍ରୀତିରଞ୍ଜନ ନାୟକ (୨୨ ବର୍ଷ), ସାନ ବ୍ରହ୍ମପୁର, ମାନସ ରଞ୍ଜନ ରାଉତ (୪୦ ବର୍ଷ), ଜିରାଳ, ସରୋଜ କୁମାର ଖୁଣ୍ଟିଆ (୨୬ ବର୍ଷ), ଜିରାଳ ଏବଂ ଆଉରଙ୍ଗଜେବ୍ ନାୟକ (୪୪ ବର୍ଷ), ନୂଆ ଆଲ୍ତୁମା । ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶ କ୍ରମେ ଶକ୍ତି, ଶିଳ୍ପ, ଏମ୍ଏସ୍ଏମ୍ଇ ଓ ଗୃହ ରାଷ୍ଟ୍ର ମନ୍ତ୍ରୀ ଦିବ୍ୟ ଶଙ୍କର ମିଶ୍ର ଗତ ସପ୍ତାହରେ ଦିନିକିଆ ଢେଙ୍କାନାଳ ଗସ୍ତ କରି ଏ ସଂପର୍କରେ ବୈଠକ ଆୟୋଜନ କରିଥିଲେ । ଆରୋଗ୍ୟ ବ୍ୟକ୍ତିମାନଙ୍କୁ ପ୍ଲାଜ୍ମା ଦାନ କରି ଅନ୍ୟ ଆକ୍ରାନ୍ତଙ୍କ ଜୀବନ ରକ୍ଷା କରିବାକୁ ନିବେଦନ କରିଥିଲେ। ଏହି ଅବସରରେ ରାଜ୍ୟ ଖଣି, ଇସ୍ପାତ ଓ ପୂର୍ତ୍ତ ମନ୍ତ୍ରୀ ପ୍ରଫୁଲ୍ଲ କୁମାର ମଲ୍ଲିକ, ପରଜଙ୍ଗ ବିଧାୟକ ଡା. ନୃସିଂହ ଚରଣ ସାହୁ, ଢେଙ୍କାନାଳ ବିଧାୟକ ସୁଧୀର କୁମାର ସାମଲ ପ୍ରମୁଖ ଉପସ୍ଥିତ ଥିଲେ ।
ଉକ୍ତ ଯୁବକମାନେ ମନ୍ତ୍ରୀଙ୍କ ଅନୁରୋଧ କ୍ରମେ ଆଗ୍ରହ ପ୍ରକାଶ କରି ଆଗେଇ ଆସିଥିବା ଜଣାପଡ଼ିଛି । ତାଲିକା ଅନୁଯାୟୀ ଜିଲ୍ଲାରେ ୫୩ ଜଣ ପ୍ଲାଜ୍ମା ଦାନ ପାଇଁ ଯୋଗ୍ୟ ବିବେଚିତ ହୋଇଛନ୍ତି । କରୋନା ପୀଡ଼ିତ ସୁସ୍ଥ ହେବା ପରେ ୪ ସପ୍ତାହ ପରେ ପ୍ଲାଜ୍ମା ଦାନ କରିପାରିବେ । ଏଥି ପାଇଁ ବ୍ୟକ୍ତିଙ୍କୁ ୧୮ରୁ ୬୦ ବର୍ଷ ବୟସ ଏବଂ ୫୫ କେଜି ହୋଇଥିବା ଆବଶ୍ୟକ । ଏ ବିଷୟରେ ଗଣମାଧ୍ୟମର ପ୍ରତିନିଧିମାନେ ଗାଆଁଗହଳିରେ ବାର୍ତ୍ତା ପହଞ୍ଚାଇବା ପରି ଗୁରୁତ୍ୱପୂର୍ଣ୍ଣ ଦାୟିତ୍ୱ ନେଇପାରିବେ ବୋଲି ମନ୍ତ୍ରୀ କ୍ୟାପ୍ଟେନ୍ ମିଶ୍ର ଆହ୍ୱାନ ଦେଇଥିଲେ । ମନ୍ତ୍ରୀ ପ୍ଲାଜ୍ମା ଦାନ କରିଥିବା ଯୁବକମାନଙ୍କୁ ଏହି ମହତ୍କାର୍ଯ୍ୟ ନିମନ୍ତେ ସାଧୁବାଦ ଜଣାଇବା ସହ ତାଙ୍କର ଏହି ମଣିଷପଣିଆ ଅନ୍ୟମାନଙ୍କୁ ପ୍ରୋତ୍ସାହିତ କରିବ ବୋଲି କହିଛନ୍ତି।
