ଦେଓଗାଁ: ଦେଓଗାଁ ବନାଞ୍ଚଳ କାର୍ଯ୍ୟାଳୟର ସଭା ଗୃହଠାରେ ରବିବାର ବନାଗ୍ନି ପ୍ରତିରୋଧ ସଚେତନତା ସଭା ଅନୁଷ୍ଠିତ ହୋଇଯାଇଛି। ଦେଓଗାଁ ରେଞ୍ଜର ଯୁଧିଷ୍ଠିର ଜାଲଙ୍କ ସଭାପତିତ୍ୱରେ ଅନୁଷ୍ଠିତ ହୋଇଥିବା ଏହି ସଚେତନତା ସଭାରେ ଦେଓଗାଁ ବିଡିଓ କ୍ଷମାନିଧି ଭୋଇ ଯୋଗ ଦେଇଥିବା ବେଳେ ମୁଖ୍ୟବକ୍ତା ଭାବରେ ଅବସର ପ୍ରାପ୍ତ ରେଞ୍ଜର ରଘୁନାଥ ପାଢ଼ୀ, ଦେଓଗାଁ ସମିତି ମୀନା କୁମାରୀ ସା ଯୋଗ ଦେଇଥିଲେ। କୁଡ଼ାସିଂହା, ଗୁଡିଭେଳା ଓ ଦେଓଗାଁ ଫରେଷ୍ଟ ସେକ୍ସନ ଅଧୀନରେ ଥିବା ୯ଟି ବିଟ୍ ଠାରେ ୪ ଜଣ ଗାର୍ଡ ରହିଛନ୍ତି। ଏହି ୩ ସେକ୍ସନରେ ୧୦ ଜଣ ପାରାଫରେଷ୍ଟ କର୍ମଚାରୀ ଥିବା ବେଳେ ନିଆଁ ଲିଭାଇବା ପାଇଁ ୧୦ ଜଣ କର୍ମଚାରୀ ରହିଛନ୍ତି। ଯେତିକି ପରିମାଣରେ କର୍ମଚାରୀ ରହିବା କଥା ସେତିକି ରହି ନଥିବାରୁ ଜଙ୍ଗଲ ନିଆଁକୁ ଆୟତ୍ତ କରିହେଉ ନାହିଁ ବୋଲି କର୍ମଚାରୀମାନେ କହିଥିଲେ।
ଅନ୍ୟପକ୍ଷରେ ଝାଡୁ, କେନ୍ଦୁପତ୍ର ଗୋଛା କଟା, ମହୁଲ ପାଇଁ ପତ୍ର ପୋଡ଼ାରେ ଅଧିକ ପରିମାଣରେ ନିଆଁ ଲାଗୁଛି। ଏହା ଦ୍ୱାରା ଯେମିତି ନିଆଁ ନ ଲାଗିବ ସେଥିପାଇଁ ବନ ସୁରକ୍ଷା ସମିତିକୁ ନେଇ ଆଲୋଚନା କରିବା ପରେ ଗାଁରେ ସଚେତନ କରିବାକୁ ଅତିଥିମାନେ ମତ ପ୍ରକାଶ କରିଥିଲେ। ଆଜିର ଏହି ସଚେତନ କାର୍ଯ୍ୟକ୍ରମରେ ଦେଓଗାଁ ଫରେଷ୍ଟର ବ୍ୟାସଦେବ ସାହୁ, ଗୁଡଭେଲା ଫରେଷ୍ଟର ମଧୁସୂଦନ ଚାନ୍ଦ, କୁଡ଼ାସିଂହା ଫରେଷ୍ଟର ହରିହର ସ୍ୱାଇଁଙ୍କ ସହ ଅଗ୍ନିଶମ, କେନ୍ଦୁପତ୍ର ବିଭାଗ ଓ ଜଙ୍ଗଲ ବିଭାଗର କର୍ମଚାରୀମାନେ ଉପସ୍ଥିତ ଥିଲେ।
