ଦେଓଗାଁ : ଦେଓଗାଁ ଥାନା ଅନ୍ତର୍ଗତ ଜାତୀୟ ରାଜପଥ ୨୬ ଉପରେ ଦେଓଗାଁ ଦମକଳ କେନ୍ଦ୍ର ନିକଟରେ ପୁଲିସ ଚଢ଼ାଉ କରି ୭ କେଜି ଗଞ୍ଜେଇ ସହ ଜଣେ ବ୍ୟକ୍ତିଙ୍କୁ ଗିରଫ କରି କୋର୍ଟ ଚାଲାଣ କରିଥିବା ଜଣାପଡିଛି।
ଗତ ଗୁରୁବାର ଦିନ ଦେଓଗାଁ ପୁଲିସ କୌଣସି ସୂତ୍ରରୁ ଖବର ପାଇ ଅଗ୍ନିଶମ ଅଫିସ ନିକଟରେ ଛିଡ଼ା ହୋଇଥିବା ଦୁଇ ଜଣ ଯୁବକଙ୍କ ଉପରେ ଚଢ଼ାଉ କରିଥିଲେ। ହେଲେ ଜଣକୁ କାବୁ କରିଥିବା ବେଳେ ଜଣେ ଫେରାର ହୋଇଯାଇଥିଲେ। କିନ୍ତୁ ଚଢ଼ାଉ ସ୍ଥାନରୁ ଦୁଇଟି ଏୟାର ବ୍ୟାଗ ମିଳିଥିଲା ତାହାକୁ ତଲାସି କରିବା ପରେ ସେଠାରେ ୭ ପ୍ୟାକେଟ ଗଞ୍ଜେଇ ଥିବା ଜଣାପଡିଥିଲା। ଗଞ୍ଜେଇକୁ ଜବତ କରି ଓଜନ କରିବା ପରେ ତାହା ୭ କେଜି ହୋଇଥିଲା। ଏନେଇ ଦେଓଗାଁ ପୁଲିସ କେଶ ନମ୍ବର ୪୨ରେ ଏକ ମାମଲା ରୁଜୁ କରି ବୌଦ୍ଧ ଜିଲ୍ଲା କଣ୍ଟାମାଲ ବ୍ଲକ ଖଳିଆ ପାଲି ଗାଁର ମହାଦେବ ରଣାଙ୍କୁ ଗିରଫ କରି କୋର୍ଟ ଚାଲାଣ କରିଥିବା ଦେଓଗାଁ ଥାନା ଅଧିକାରୀ ହରିବନ୍ଧୁ ଗଡ଼ତ୍ୟା ସୂଚନା ଦେଇଛନ୍ତି।
Comments are closed.