ଦୋବାଲ : ଭଦ୍ରକ ଜିଲ୍ଲା ଧାମନଗର ଫଳପୁର ରାସ୍ତାରେ ଲୁଟେରାଙ୍କ ଆତଙ୍କରାଜ। ରାମେଶ୍ବରପୁର ଗେଟ୍ ପାଖରେ ୨ଜଣ ଦୁର୍ବୃତ୍ତ ବଡି ଭୋରୁ ରାସ୍ତାରେ ସ୍କୁଟିରେ ଯାଉଥିବା ଯୁବତୀଙ୍କ ଠାରୁ ସୁନା ହାର, ରୁପା ମୁଦି ଝାମ୍ପିନେବା ସହ ସ୍କୁଟି ଭାଙ୍ଗିଦେଇଥିବା ଥାନାରେ ଅଭିଯୋଗ ହୋଇଛି।
ଅଭିଯୋଗ ମୁତାବକ, ପଧାନୀ ପଞ୍ଚାୟତର କଣ୍ଟଦା ଗ୍ରାମର ସୁଧୀର କୁମାର ପତିଙ୍କ ଝିଅ ସୁଭସ୍ମିତା ପତି(୨୦) ଶୁକ୍ରବାର ବଡ଼ି ଭୋରୁ ସ୍କୁଟି ସାହାଯ୍ୟରେ ବାପାଙ୍କୁ ସାଥିରେ ଧରି ଧାମନଗର ଅଭିମୁଖେ ଯାଇଥିଲେ। ବାପାଙ୍କର କଲିକତା ଯିବାର ଥିବାରୁ ଝିଅ ତାଙ୍କୁ ଧାମନଗର ଛାଡ଼ି ଏକା ଘରକୁ ଫେରୁଥିଲେ। ହଠାତ୍ ରାମେଶ୍ବରପୁର ଗେଟ୍ ନିକଟରେ ୨ଜଣ ଦୁର୍ବୃତ୍ତ ବାଇକ୍ ଯୋଗେ ପଛରୁ ଆସି ସୁଭସ୍ମିତାକୁ ଧକ୍କା ଦେଇଥିଲେ। ସୁଭସ୍ମିତା ତଳେ ପଡିଯିବାରୁ ପିନ୍ଧିଥିବା ସୁନା ଅଳଙ୍କାର ଛଡାଇ ନେଇଥିଲେ। ସେହି ସମୟରେ ସାମ୍ନାରୁ ଅନ୍ୟ ଗାଡି ଲାଇଟ୍ ପଡ଼ିବାରୁ ଦୁର୍ବୃତ୍ତ ମାନେ ପଳାଇଥିଲେ। ଏହାକୁ ନେଇ ବାପା ସୁଧୀର ଧାମନଗର ଥାନାରେ ଲିଖିତ ଅଭିଯୋଗ କରିଛନ୍ତି। ଧାମନଗର ପୁଲିସ ଅଭିଯୋଗ ପାଇ ତଦନ୍ତ ଆରମ୍ଭ କରିଛି। ତେବେ ପ୍ରେମ ଜନିତ କାରଣରୁ ଏଭଳି ଘଟଣା ହୋଇଥିବା ଚର୍ଚ୍ଚା ହେଉଛି। ଏହାକୁ ପରିବାର ଲୋକେ ଖଣ୍ଡନ କରିଛନ୍ତି। ଅନ୍ୟପକ୍ଷେ ଏହି ନିଛାଟିଆ ରାସ୍ତାରେ ପୁଲିସ ପଇଁନ୍ତରା ନହେବାରୁ ଲୁଟେରା ମାନେ ବିଭିନ୍ନ ସମୟରେ ଛିନ୍ତାଇ ଭଳି ଆତଙ୍କରାଜ ଘଟାଉଥିବା ଅଭିଯୋଗ ହେଉଛି।
Comments are closed.