ପାଟଣା: ଦାଦନ ଖଟିବାକୁ ଯାଇ ପୁରୀ ଜିଲ୍ଲା କାକଟପୁରରେ ଜଣେ ଶ୍ରମିକଙ୍କୁ ମୃତ୍ୟୁ ହୋଇଛି। ଚିକିତ୍ସା ଅବହେଳାରୁ କାକଟପୁର ମେଡିକାଲରେ ତାଙ୍କର ମୃତ୍ୟୁ ହୋଇଥିବା ଅଭିଯୋଗ ହୋଇଛି। ମୃତ ଶ୍ରମିକ ହେଉଛନ୍ତି କେନ୍ଦୁଝର ଜିଲା ପାଟଣା ବ୍ଲକ ଧନୁର୍ଜୟପୁର ଗ୍ରାମର ଦଶରଥ ମହାରଣା।
ସୂଚନାଯୋଗ୍ୟ, ପାଟଣା ଥାନା ମୁଷାଖୋରୀ ପଂଚାୟତ ଧନୁର୍ଜୟପୁର ଗ୍ରାମର ବନମାଳି ମହାରଣାଙ୍କ ପୁଅ ଦଶରଥ ମହାରଣା(୪୦) ପତ୍ନୀ ସଂଯୁକ୍ତା ମହାରଣାଙ୍କ ସହ କାମଧନ୍ଦା ଅନ୍ବେଷଣରେ ଦାଦନ ଖଟିବାକୁ ପୁରୀ ଜିଲ୍ଲା କାକଟପୁର ଯାଇଥିଲେ। ସେଠାରେ ସେମାନେ କାକଟପୁର ବ୍ଲକ ପଥରପକା ଗ୍ରାମରେ ରହିଥିଲେ। ବୁଧବାର ରାତିରେ ଦଶରଥଙ୍କୁ ଭୀଷଣ ଜ୍ୱର ହେବାରୁ ଚିକିତ୍ସା ନିମନ୍ତେ କାକଟପୁର ମେଡିକାଲକୁ ନିଆଯାଇଥିଲା। ତେବେ ଜ୍ୱର ଭଲ ନ ହେବାରୁ ଗୁରୁବାର ତାଙ୍କୁ ପୁନର୍ବାର ମେଡିକାଲକୁ ନିଆଯାଇଥିଲା । ସେଠାରେ ଡାକ୍ତର ତାଙ୍କୁ ଏକ ଇଂଜେକ୍ସନ ଦେଇଥିଲେ। ଇଂଜେକ୍ସନ ଦେବାର କିଛି ସମୟ ପରେ ଦଶରଥଙ୍କ ମୃତ୍ୟୁ ହୋଇଥିଲା ବୋଲି ତାଙ୍କ ପତ୍ନୀ ଅଭିଯୋଗ କରିଛନ୍ତି। ଦଶରଥଙ୍କ ମୃତ୍ୟୁ ଖବର ଜଣାପଡିବା ପରେ ଗ୍ରାମରେ ଶୋକର ଛାୟା ଖେଳିଯାଇଛି ।
