କୁଶଙ୍ଗ ବନ୍ୟପ୍ରାଣୀ ଅଭୟାରଣ୍ୟରେ ଅଜଗରର ସନ୍ଦେହଜନକ ମୃତ୍ୟୁ

ହରଭଙ୍ଗା : ନୟାଗଡ ବନ୍ୟପ୍ରାଣୀ ବନଖଣ୍ଡ ଅଧିନସ୍ଥ ହରଭଙ୍ଗା ବ୍ଲକ କୁଶଙ୍ଗ ବନ୍ୟପ୍ରାଣୀ ରେଞର ଶୀତଳପାଣି ବିଟ୍ ଅଂଚଳରେ ୨୦-୨୫ଦିନ ତଳେ ଏକ ଅଜଗର ସାପର ସନ୍ଦେହଜନକ ଭାବେ ମୃତ୍ୟୁ ଘଟିଥିବା କୁହାଯାଉଛି। ମୃତ ଅଜଗରର ଲମ୍ବ ୧୦ଫୁଟ ହୋଇଥିବାବେଳେ ମୋଟା ୧ଫୁଟ ବୋଲି ଏକ ନିର୍ଭରଯୋଗ୍ୟ ସୂତ୍ରରୁ ସୂଚନା ମିଳିଛି। ହେଲେ ସାପଟିର ଅଭୟାରଣ୍ୟ ମଧ୍ୟରେ କିପରି ମୃତ୍ୟୁ ହେଲା ଏହାପଛର କାରଣ ଖୋଳତାଡ କରିବା ପରିବର୍ତ୍ତେ କୁଶଙ୍ଗ ବନ୍ୟପ୍ରାଣୀ ବିଭାଗ ବିନା ବ୍ୟବଛେଦରେ ମୃତ ସାପଟିକୁ ପୋତି ଦେଇଥିବା ଖବର ମିଳିଛି ।

ପ୍ରକାଶ ଯେ କୁଶଙ୍ଗ ଅଭୟାରଣ୍ୟ ମଧ୍ୟରେ ବିଭିନ୍ନ ପ୍ରଜାତିର ବିଷଧର ସାପ ସହ ଅନେକ ପ୍ରଜାତିର ବନ୍ୟପ୍ରାଣୀ ରହିଛନ୍ତି ।ଅଭୟାରଣ୍ୟ ମଧ୍ୟରେ ଶଦ୍ଦ ପ୍ରଦୂଷଣ ପାଇଁ ଗାଡିଚଳାଚଳ ବନ୍ଦ ସହିତ ରାତିରେ ଯାତାୟତକୁ ବାରଣ କରାଯାଉଛି । ଅଜଗର ସାପ ଉପରେ ଗାଡିଚଢିଯିବାରୁ ମୃତ୍ୟୁ ଘଟିଥିବା କୁହାଯାଉଛି। ତାହାହେଲେ ରାତିରେ ଅଭୟାରଣ୍ୟ ମଧ୍ୟରେ କିପରି ଗାଡି ଚଳାଚଳ ହେଉଛି ସେ ବିଷୟରେ ବିଭାଗୀୟ ରେଞ ଅଫିସରଙ୍କ ପାଖରେ ଖବର ନଥିବା ଆଶ୍ଚର୍ଯ୍ୟ କରିଛି। ଏ ଦିଗରେ ଉଚ୍ଚସ୍ତରୀୟ ତଦନ୍ତ କରାଯିବା ସହ ସାପ ମୃତ୍ୟୁର ରହସ୍ୟ ଉନ୍ମୋଚନ ପାଇଁ ପରିବେଶ ଏବଂ ବନ୍ୟପ୍ରାଣୀ ପ୍ରେମୀଙ୍କ ମହଲରୁ ଦାବୀ ଉଠୁଛି । ଏ ସର୍ମ୍ପକରେ କୁଶଙ୍ଗ ବନ୍ୟପ୍ରାଣୀ ରେଞ ଅଫିସର ଲକ୍ଷ୍ମୀନାରାୟଣ ପଣ୍ଡାଙ୍କୁ ଯୋଗାଯୋଗ କରିଥିଲେ ମଧ୍ୟ ସେ ଫୋନ ନ ଉଠାଇବାରୁ ତାଙ୍କର ପ୍ରତିକ୍ରିୟା ମିଳିପାରିନାହିଁ । ତେବେ ଏ ସର୍ମ୍ପକରେ ହରଭଙ୍ଗା ବ୍ଲକ ପ୍ରାଣୀଚିକିତ୍ସା ଅଧିକାରୀ ଡାକ୍ତର ବିରେନ୍ଦ୍ର ପୃଷ୍ଟିଙ୍କୁ ପଚାରିବାରୁ ସେ କହିଲେ ସାପ ମୃତ୍ୟୁ ବିଷୟରେ ବିଷୟରେ ଆମକୁ ବ୍ୟବଛେଦ ପାଇଁ କେହି କହିନଥିବା କହିଥିଲେ।