କଲକାତା : ଅମ୍ପନ ଆଜିକୁ ୧୮ଦିନ ବିତିଥିବାବେଳେ ଗତକାଲି ରାତ୍ରିରୁ ହାସନାବାଦର ବିଭିନ୍ନ ଅଞ୍ଚଳରେ ପୁଣି ଜୁଆର ପାଣି ମାଡ଼ି ଆସିବାଦ୍ବାରା ନୂତନ ଭାବେ ୯ଟି ଗ୍ରାମ ପ୍ଲାବିତ ହୋଇଥିବା ଜଣାପଡ଼ିଛି। କେବଳ ହାସନାବାଦ ନୁହେଁ ବସିରହାଟର କେତେକ ଗ୍ରାମ ମଧ୍ୟ ପ୍ଲାବିତ ହୋଇଛି। ସେହିପରି ପାଣି ସ୍ରୋତରେ ହାସନାବାଦ, ହିଜଳିଗଞ୍ଜ ଓ ସନ୍ଦେଶଖାଲିେର ନୂତନ ଭାବେ ବହୁ କ୍ଷୟକ୍ଷତି ଘଟିଛି। ଅଞ୍ଚଳରେ ଜୁଆର ପାଣି ମାଡ଼ି ଆସିବାଦ୍ବାରା ପ୍ରାୟ ଆଠଶହ ଭଳି ଘର ପାଣି ଘେରରେ ରହିଛି। ଅନ୍ୟପକ୍ଷରେ ହାସନାବାଦର ପାଟଲିଖାନପୁର ଅଞ୍ଚଳର ‘ଭାଁସା’ ନଦୀବନ୍ଧଟି ଜୁଆର ପାଣିରେ ଧକ୍କା ଖାଇ ଭାଙ୍ଗିଯିବାଦ୍ବାରା ସକାଳୁ ଟିୟାମାରି, ତିଲେରଚକ, ବେନା, ବେଦପାଟଲି, ବାଲିଘାଡ଼ାଙ୍ଗା, ଠାକୁରାଣିଆବାଦ, ଗୋୟାଲଆଟି, ଖାଁପୁକୁରର ବହୁ ଅଞ୍ଚଳ ପ୍ଲାବିତ ହୋଇଯାଇଛି। ଏପରିକି ଉଚ୍ଚ ଅଞ୍ଚଳ ଭାବେ ପରିଚିତ ସ୍ଥାନୀୟ ଶୁକୁକୁନିର ମୁକ୍ତାରଚକ ଅଞ୍ଚଳରେ ମଧ୍ୟ ବନ୍ୟା ପରିସ୍ଥିତି ସୃଷ୍ଟି ହୋଇଛି। ସେହିରି ହିଜଳିଗଞ୍ଜର ରୂପମାରି ପଞ୍ଚାୟତର ବାଇନାଡ଼ା, ଗେୟୋଁମାରି ଇଲକାରେ ନୂତନ ଭାବେ ଜୁଆର ପାଣି ପ୍ରବେଶ କରିବାଦ୍ବାରା ଅଞ୍ଚଳବାସୀ ଅନ୍ୟ ସ୍ଥାନରେ ଆଶ୍ରୟ ନେବାକୁ ବାଧ୍ୟ ହୋଇଛନ୍ତି। ଫଳରେ ସ୍ଥାନୀୟ ଉଚ୍ଚ ରାସ୍ତାରେ ଗ୍ରାମବାସୀମାନେ ଆଶ୍ରୟ ନେଇଥିବା ଦେଖାଯାଇଛି।
ଅମ୍ପନ ଆଜକୁ ୧୮ଦିନ ଅତିକ୍ରମ କରିଥିବାବେଳେ ନୂତନ ଭାବେ ଉପରୋକ୍ତ ଅଞ୍ଚଳଗୁଡ଼ିକରେ ଜୁଆର ପାଣି ପ୍ରବେଶ କରି ବନ୍ୟା ପରିସ୍ଥିତି ସୃଷ୍ଟି କରିବାଦ୍ବାରା ପ୍ରାୟ ୧୨ହଜାର ଭଳି ଗ୍ରାମବାସୀ ବାସହରା ହେବାକୁ ବାଧ୍ୟ ହୋଇଛନ୍ତି। ରାଜରାସ୍ତାରେ ଆଶ୍ରୟ ନେଇଥିଲେ ସୁଦ୍ଧା କଳା ବାଦଳ ଓ ଝିପିଝିିପି ବର୍ଷା ଆରମ୍ଭ ହେବାଦ୍ବାରା ସମଗ୍ର ପରିସ୍ଥିତି ବୋଝ ଉପରେ ନଳିତା ବିଡ଼ା ସଦୃଶ ହୋଇଛି। ପ୍ରଶାସନ ପକ୍ଷରୁ ସାହାଯ୍ୟ ଓ ସହଯୋଗର ହାତ ବଢ଼ାଇ ଦିଆଯାଇଥିଲେ ସୁଦ୍ଧା ଗ୍ରାମବାସୀମାନେ ଆତଙ୍କିତ ହୋଇପଡ଼ିଛନ୍ତି।
ଅଞ୍ଚଳବାସୀଙ୍କ ବକ୍ତବ୍ୟ ଯେ ଗତ ଶୁକ୍ରବାରଠୁ ନଦୀଗୁଡ଼ିକରେ ଧୀରେ ଧୀରେ ପାଣି ବୃଦ୍ଧି ପାଉଛି। ଅଞ୍ଚଳର କେତେକ ନଦୀବନ୍ଧ ଦୁର୍ବଳ ଥିବାରୁ ସେହିସ୍ଥାନଗୁଡ଼ିକରେ ଫାଟ ସୃଷ୍ଟି ହୋଇ ଏଭଳି ପରିସ୍ଥିତି ସୃଷ୍ଟି କରିଛି। ପ୍ରଶାସନ ପକ୍ଷରୁ ରିଲିଫ୍ ସାମଗ୍ରୀ ବଣ୍ଟନ ଓ ଆଶ୍ରୟ ଉପରେ ଗୁରୁତ୍ବ ଦେଉଥିଲେ ସୁଦ୍ଧା ବନ୍ଧ ମରାମତି ପ୍ରତି ବିଶେଷ ଗୁରୁତ୍ବ ଦେଉନାହିଁ, ଯାହାଦ୍ବାରା ପ୍ରତିବର୍ଷ ପରିସ୍ଥିତି ଏଭଳି ହେଉଛି। ହାସନାବାଦ, ହିଞ୍ଜିଳିଗଞ୍ଜ ସହ ମୌସୁନୀ ଓ ଘୋଡ଼ାମାରା ଦ୍ବୀପର ବହୁ ଚାଷ ଜମି ଏହି ଜୁଆରରେ ପ୍ଲାବିତ ହୋଇଯାଇଛି ବୋଲି ସେମାନେ କହିଛନ୍ତି।
