କଟକ: ସାଇକେଲ ଚଳାଇବା, ପରିବେଶକୁ ପ୍ରଦୂଷଣ ମୁକ୍ତ ରଖିବା ସହ ସୁସ୍ଥ ରହିବା ଏବଂ ସବୁଜ ଓ ସୁନ୍ଦର କଟକ ଗଢ଼ିବାରେ ସହାୟକ ହେବା। ଏପରି ବାର୍ତ୍ତା ନେଇ (ରବିବାର) କଟକରେ ବହୁ ବୁଦ୍ଧିଜୀବୀ ସକାଳୁ ସାଇକେଲ ରାଲିରେ ବାହାରିଥିଲେ। କଟକସ୍ଥିତ ଓଡ଼ିଶା ରାଜ୍ୟ ଆଇନସେବା ପ୍ରାଧିକରଣ ଓ ଜିଲ୍ଲା ପ୍ରଶାସନର ମିଳିତ ଆନୁକୂଲ୍ୟରେ ଆଜି ଏହି ସାଇକେଲ ରାଲି ଅନୁଷ୍ଠିତ ହୋଇଥିଲା। ଓଡ଼ିଶା ହାଇକୋର୍ଟର ମୁଖ୍ୟ ବିଚାରପତି କଳ୍ପେସ ସତ୍ୟେନ୍ଦ୍ର ଝାଭେରୀଙ୍କ କ୍ୟାଣ୍ଟନମେଣ୍ଟସ୍ଥିତ ସରକାରୀ କ୍ୱାର୍ଟସ ପାଖରୁ ଆରମ୍ଭ ହୋଇଥିବା
ଏହି ସାଇକେଲ ରାଲିକୁ ମୁଖ୍ୟ ବିଚାରପତିଙ୍କ ଅନୁରୋଧକ୍ରମେ ବିଚାରପତି ଚିତ୍ତରଞ୍ଜନ ଦାଶ ପତାକା ଦେଖାଇ ଶୁଭାରମ୍ଭ କରିଥିଲେ। ଏହି ରାଲି ସେଠାରୁ ବାହାରି ଐତିହାସିକ ବାରବାଟୀ ଦୁର୍ଗ ଦେଇ ବାଲିଯାତ୍ରା ପଡ଼ିଆ, ରିଙ୍ଗ ରୋଡ଼ ଦେଇ ରାଜ୍ୟ ଆଇନସେବା ପ୍ରାଧିକରଣ ପର୍ଯ୍ୟନ୍ତ ଆସିଥିଲା। ଏହି ରାଲିରେ ଓଡ଼ିଶା ହାଇକୋର୍ଟର ବିଚାରପତି ବିଦ୍ୟୁତ୍ ରଞ୍ଜନ ଷଡ଼ଙ୍ଗୀ, ବିଚାରପତି ସଙ୍ଗମ କୁମାର ସାହୁଙ୍କ ସମେତ ଅନ୍ୟ ବିଚାରପତି ବୃନ୍ଦ ଯୋଗଦେଇଥିଲେ। ଏହି ଅବସରରେ ମୁଖ୍ୟ ବିଚାରପତି ବିଶ୍ୱ ତାପାୟନକୁ ହ୍ରାସ ପାଇଁ ସାମୂହିକ ଉଦ୍ୟମ ଉପରେ ଗୁରୁତ୍ୱ ଆରୋପ କରିଥିଲେ।
