କାଳୀ ପୂଜା ଭସାଣି ବେଳେ ଗଣ୍ତଗୋଳ: ୬ ଆହତ

କଟକ : କଟକ ସହରରେ ରବିବାର ରାତିରେ କାଳୀ ଭସାଣ ଚାଲିଥିବାବେଳେ ଦୁଇଗୋଷ୍ଠୀ ମଧ୍ୟରେ ସଂଘର୍ଷ ହୋଇଛି। ଚାନ୍ଦନୀଚୌକ୍‌ ଛକ ନିକଟରେ ହୋଇଥିବା ଏହି ସଂଘର୍ଷରେ ୬ ଜଣ ଆହତ ହୋଇଥିବାବେଳେ ଗୋଟିଏ ଦୋକାନ ସହ ୩ଟି ମୋଟର ସାଇକଲ ଭାଙ୍ଗିଛି। ଲାଲବାଗ ଥାନା ପୁଲିସ ପହଞ୍ଚି ଗଣ୍ଡଗୋଳକାରୀଙ୍କୁ ଘଉଡ଼ାଇବା ପାଇଁ ମୃଦୁ ଲାଠିଚାଳନା କରିଥିବା ଜଣାପଡ଼ିଛି। ମହମ୍ମଦିଆ ବଜାର ଓ ଚାନ୍ଦନୀଚୌକ୍‌ ଯୁବକଙ୍କ ମଧ୍ୟରେ ଏହି ଗଣ୍ଡଗୋଳ ହୋଇଛି। ସୂଚନାନୁଯାୟୀ, ମହମ୍ମଦିଆ ବଜାର ଅଞ୍ଚଳର କିଛି ଯୁବକ ମେଢ଼ ବିସର୍ଜନ କରି ଫେରୁଥିବା ସମୟରେ ଚାନ୍ଦନୀଚୌକ ହସିନାବାଗ ଅଞ୍ଚଳର କିଛି ଯୁବକଙ୍କ ସହ ରୟାଲ ଗାର୍ଡେନ ନିକଟରେ ପାଟିତୁଣ୍ଡ ହୋଇଥିଲା। ଏହାପରେ ଉଭୟ ପକ୍ଷଙ୍କ ମଧ୍ୟରେ ଢେଲାପଥର ସହ କାଚ ବୋତଲ ମାଡ଼ ହୋଇଥିଲା। କାହିଁକି ଏହି ଗଣ୍ଡଗୋଳ ଘଟିଲା ତାହାର କାରଣ ଜଣାପଡ଼ି ନାହିଁ। ଅପରପକ୍ଷରେ ଅଭିଯୁକ୍ତମା​‌େ​‌ନ ଘଟଣାସ୍ଥଳରୁ ଫେରାର ହୋଇଯାଇଥିବାବେଳେ ପୁଲିସ ସେମାନଙ୍କୁ ଧରିବା ପାଇଁ ଉଦ୍ୟମ ଜାରି ରଖିଥିବା ଥାନାଧିକାରୀ ଦୟାନିଧି ନାୟକ କହିଛନ୍ତି ।
ସେହିପରି ଚୌଧୁରୀ ବଜାର ପୂର୍ଣ୍ଣସାହୁ ଛକ ନିକଟରେ ମଧ୍ୟ ଏକ ମେଢ଼କୁ ଆଗକୁ ନେବା ପାଇଁ ସାମାନ୍ୟ ଉତ୍ତେଜନା ସୃଷ୍ଟି ହୋଇଥିବାବେଳେ ପୁଲିସ ପକ୍ଷରୁ ମୃଦୁ ଲାଠିଚାଳନା କରାଯାଇଥିଲା। ଏହି ଛକ ନିକଟରେ ଏକ ନିର୍ଦିଷ୍ଟ ମେଢ଼କୁ ଅଟକାଇ ଶୋଭାଯାତ୍ରାକାରୀ ନାଚକୁଦ କରିବାରୁ ଶୋଭାଯାତ୍ରାରେ ବିଳମ୍ବ ଘଟିଥିଲା। ମେଢ଼କୁ ଆଗକୁ ନେବା ଲାଗି ପୁଲିସ ପକ୍ଷରୁ ନିବେଦନ କରାଯାଇଥିଲେ ମଧ୍ୟ ଶୋଭାଯାତ୍ରାକାରୀ କର୍ଣ୍ଣପାତ କରି ନ ଥିଲେ। ପୁଲିସ ବାଧ୍ୟହୋଇ ମେଢ଼କୁ ଆଗକୁ ପେଲିବାକୁ ଉଦ୍ୟମ କରିବାରୁ ଶୋଭାଯାତ୍ରାକାରୀ ବିରୋଧ କରିଥିଲେ। ପୁଲିସ ସେମାନଙ୍କୁ ଘଉଡ଼ାଇବା ପାଇଁ ଲାଠି ଚାଳନା କରିଥିଲା ବୋଲି ପୁରୀଘାଟ ଥାନାଧିକାରୀ ଯତୀନ୍ଦ୍ର ସେଠୀ କହିଛନ୍ତି। ଖବର ଲେଖାହେବା ପର୍ଯ୍ୟନ୍ତ ଏ ନେଇ ଥାନାରେ କୌଣସି ଅଭିଯୋଗ ହୋଇନଥିବା ପ୍ରକାଶ।