ଆମେ ଭୁଲିବୁନି କି କ୍ଷମା କରିବୁନି…କଠୋର ପଦକ୍ଷେପ ନେବୁ: ସିଆରପିଏଫ

ଶ୍ରୀନଗର: ଗୃହ ମନ୍ତ୍ରୀ ରାଜନାଥ ସିଂହ ଶ୍ରୀନଗରଠାରେ ପୁଲୱାମା ଆକ୍ରମଣରେ ସହିଦ ଯବାନଙ୍କୁ ଶ୍ରଦ୍ଧାଞ୍ଜଳି ଦେଇଛନ୍ତି। ଆକ୍ରମଣରେ ପ୍ରାଣ ହରାଇଥିବା ଯବାନଙ୍କ ମରଶରୀରକୁ ଶ୍ରୀନଗର ଅଣାଯାଇଥିଲା। କେନ୍ଦ୍ର ଗୃହ ମନ୍ତ୍ରୀ ରାଜନାଥ ସିଂହ ଶ୍ରଦ୍ଧାଞ୍ଜଳି ଦେବା ପରେ ମରଶରୀରକୁ ଯବାନଙ୍କ ଜନ୍ମସ୍ଥାନ ଅଭିମୁଖେ ପଠାଯାଇଥିଲା। ସୁରକ୍ଷାବାହିନୀ ପକ୍ଷରୁ ମଧ୍ୟ ସେମାନଙ୍କୁ ଗାର୍ଡ ଅଫ୍ ଅନର ପ୍ରଦାନ କରାଯାଇଥିଲା। ଗୃହ ମନ୍ତ୍ରୀ ନିଜେ କଫିନ୍‌ ଗୁଡିକୁ ଗାଡ଼ିକୁ ବୋହି ନେଇଥିଲେ। ଗୃହମନ୍ତ୍ରୀ ରାହନାଥ ସିଂହ, ରାଜ୍ୟପାଳ ସତ୍ୟପାଲ ମଲିକ, ଗୃହ ସଚୀବ ରାଜୀବ ଗୌବା, ସିଆରପିଏଫ ମହାନିର୍ଦ୍ଦେଶକ ଆର. ଆର. ଭଟନାଗର, ଜାମ୍ମୁ କାଶ୍ମୀର ପୁଲିସ ଡିଜି ଦୀଲବାଗ ସିଂହ ଶହୀଦ ଯବାନମାନଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରିଥିଲେ। ଗୃହମନ୍ତ୍ରୀ କହିଛନ୍ତି, ଶହୀଦ ଯବାନମାନଙ୍କ ପ୍ରାଣବଳୀ ବ୍ୟର୍ଥ ଯିବାକୁ ଦିଆଯିବ ନାହିଁ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଶହୀଦ ଯବାନମାନଙ୍କ ପ୍ରତି ଶ୍ରଦ୍ଧାଞ୍ଜଳି ଅର୍ପଣ କରିବା ଅବସରରେ କହିଛନ୍ତି, ଆକ୍ରମଣରେ ଜଡିତ କାହାକୁ ବି ଛଡ଼ାଯିବନି ଏବଂ ସେଥିପାଇଁ ସୁରକ୍ଷା ବଳକୁ ସମ୍ପୂର୍ଣ ଅଧିକାର ଦିଆଯିବ। ସିଆରପିଏଫ କହିଛି ଯେ, ଏଭଳି ଆତଙ୍କୀ ଆକ୍ରମଣରେ ଲିପ୍ତ ବ୍ୟକ୍ତିଙ୍କୁ ସେମାନେ କେବେ ବି ଭୁଲିବେନି, କଠୋର ପଦକ୍ଷେପ ନେବୁ ।