ବିଶାଖାପାଟଣା: ପ୍ରଥମ ଦିନିକିଆ ମ୍ୟାଚ୍ରେ ୱାଙ୍ଖେଡ଼େ ଷ୍ଟାଡିୟମ୍ ପିଚ୍ରୁ ପେସ୍ ବୋଲର ବେଶ୍ ସହାୟତା ପାଇଥିଲେ। ଫଳରେ ମ୍ୟାଚ୍ରେ କମ୍ ସ୍କୋର୍ ହୋଇଥିଲେ ହେଁ ଏହା ସଂଘର୍ଷପୂର୍ଣ୍ଣ ହୋଇ ପାରିଥିଲା। ଭାରତ ଉକ୍ତ ମ୍ୟାଚ୍କୁ ଜିତି ୩ ମ୍ୟାଚ୍ର ଶୃଙ୍ଖଳାରେ ୧-୦ରେ ଆଗୁଆ ରହିଛି। ରବିବାର ଏଠାରେ ୨ୟ ଦିନିକିଆ ମ୍ୟାଚ୍ ଖେଳାଯିବ। ଏହାକୁ ଜିତି ଶୃଙ୍ଖଳା ଜିତିବା ଲକ୍ଷ୍ୟରେ ଭାରତ ରହିଛି। ବିଶ୍ବର ୨ନଂ ଦଳ ଅଷ୍ଟ୍ରେଲିଆ ବିପକ୍ଷରେ ଶୃଙ୍ଖଳା ବିଜୟ ଦିନିକିଆ ବିଶ୍ବକପ୍ ବର୍ଷରେ ଆୟୋଜକ ଭାରତକୁ ଦୃଢ଼ ଆତ୍ମବିଶ୍ବାସ ଦେବ। ଭାରତ ପାଇଁ ଖୁସିର ଖବର ଯେ ରୋହିତ ଶର୍ମା ଦଳକୁ ଫେରିଛନ୍ତି ଏବଂ ୨ୟ ଦିନିକିଆରେ ନେତୃତ୍ବ ନେବେ। ଭାରତ ପାଇଁ ଆଉ ଏକ ଖୁସିର ଖବର ଯେ ଖରାପ ବ୍ୟାଟିଂ ଫର୍ମ ଯୋଗୁଁ ଟେଷ୍ଟ ଶୃଙ୍ଖଳାର ଶେଷ ୨ଟି ମ୍ୟାଚ୍ ଖେଳିନଥିବା କେ.ଏଲ୍. ରାହୁଲ ଫର୍ମକୁ ଫେରିଛନ୍ତି ଏବଂ ତାଙ୍କର ଧୈର୍ଯ୍ୟପୂର୍ଣ୍ଣ ଅପରାଜିତ ୭୫ ରନ୍ ବଳରେ ଭାରତ ଜିତିଥିଲା। କେବଳ ଏତିକି ନୁହେଁ; ଆଣ୍ଠୁ ଅସ୍ତ୍ରୋପଚାର ଯୋଗୁଁ ୮ ମାସ ପରେ ଦିନିକିଆ କ୍ରିକେଟ୍ ଖେଳିଥିବା ରବୀନ୍ଦ୍ର ଜାଡ଼େଜା ୨ଟି ୱିକେଟ ନେବା ସହ ଅପରାଜିତ ୪୫ ରନ୍କରି ପ୍ଲେୟର ଅଫ୍ ଦି ମ୍ୟାଚ୍ ହୋଇଥିଲେ। ଜାଡ଼େଜା ଟେଷ୍ଟ ଶୃଙ୍ଖଳାର ଫର୍ମ ଦିନିକିଆରେ ଦେଖାଇଛନ୍ତି।
Comments are closed.