ଭାରତରେ କରୋନା ସଂକ୍ରମଣ ଆରୋଗ୍ୟ ହାର ୪୨.୪୫%କୁ ବୃଦ୍ଧି – ୨୪ ଘଂଟାରେ ରେକର୍ଡ ସଂଖ୍ୟକ ୬୩୮୭ ସଂକ୍ରମିତ ଚିହ୍ନଟ

ସମାଜ ପୋର୍ଟାଲ ଡେସ୍କ: ଦେଶରେ ମୋଟ ୬୪ ହଜାର ୪୨୬ ଜଣ କରୋନା ସଂକ୍ରମିତ ଆରୋଗ୍ୟ ହୋଇଛନ୍ତି ଏବଂ କରୋନା ସଂକ୍ରମଣ ଆରୋଗ୍ୟ ହାର ୪୨.୪୫ ପ୍ରତିଶତକୁ ବୃଦ୍ଧି ପାଇଥିବା ସ୍ୱାସ୍ଥ୍ୟ ଏବଂ ପରିବାର କଲ୍ୟାଣ ମନ୍ତ୍ରଣାଳୟ କହିଛି। ଗତ ୨୪ ଘଣ୍ଟା ମଧ୍ୟରେ ୩ ହଜାର ୯୩୫ ଜଣ ସୁସ୍ଥ ହୋଇଥିବା ମନ୍ତ୍ରାଳୟ ସ୍ପଷ୍ଟ କରିଛି।

ଅନ୍ୟ ପକ୍ଷରେ ଗତ ୨୪ ଘଣ୍ଟା ମଧ୍ୟରେ ରେକର୍ଡ ସଂଖ୍ୟକ ୬ ହଜାର ୩୮୭ଟି ନୂଆ ସଂକ୍ରମଣ ମାମଲା ମଧ୍ୟ ଚିହ୍ନଟ ହୋଇଛି ଫଳରେ ମୋଟ ସଂକ୍ରମଣ ସଂଖ୍ୟା ୧ ଲକ୍ଷ ୫୧ ହଜାର ୭୬୭କୁ ବୃଦ୍ଧି ପାଇଛି। ସ୍ୱାସ୍ଥ୍ୟ ମନ୍ତ୍ରଣାଳୟ କହିଛି ଯେ ଗତ ୨୪ ଘଂଟାରେ ୧୭୦ ଜଣ ସଂକ୍ରମିତଙ୍କ ମୃତ୍ୟୁ ସହ ମୋଟ ମୃତ୍ୟୁ ସଂଖ୍ୟା ୪ ହଜାର ୩୩୭ରେ ପହଂଚିଛି।

ସମ୍ପ୍ରତି ୮୩ ହଜାର ୪ଟି ସକ୍ରିୟ ମାମଲା ଥିବାବେଳେ ୬୪ହଜାର ୪୨୫ ଜଣ ସୁସ୍ଥ ହୋଇ ହସପିଟାଲରୁ ଡିସଚାର୍ଜ ହୋଇଛନ୍ତି ଏବଂ ଜଣେ ସ୍ଥାନାନ୍ତରିତ ହୋଇଛନ୍ତି। ସମସ୍ତ ରାଜ୍ୟ ମଧ୍ୟରେ ମହାରାଷ୍ଟ୍ରରେ ସର୍ବାଧିକ ୫୪ହଜାର ୭୫୮ଟି କୋଭିଡ – ୧୯ ମାମଲା ରହିଛି। ତାମିଲନାଡୁରେ ୧୭ହଜାର ୭୨୮, ଗୁଜୁରାଟରେ ୧୪ହଜାର ୮୧୧ଟି ସଂକ୍ରମଣ ମାମଲା ଥିବାବେଳେ ଦିଲ୍ଲୀରେ ୧୪ ହଜାର ୪୬୫ଟି ମାମଲା ରହିଛି।