ପାଟନା: ଆରଜେଡି ମୁଖ୍ୟ ଲାଲୁ ପ୍ରସାଦ ଯାଦବଙ୍କ ବଡ଼ ପୁଅ ତେଜପ୍ରତାପ ଯାଦବ ଏବଂ ବୋହୁ ଐଶ୍ଵର୍ଯ୍ୟା ରାୟଙ୍କ ଛାଡ଼ପତ୍ର ମାମଲାର ଶୁଣାଣି ପାଟନାର ଫ୍ୟାମିଲି କୋର୍ଟରେ ମଙ୍ଗଳବାର ହୋଇଥିଲା। ଏହି ଅବସରରେ କୋର୍ଟ ତେଜପ୍ରତାପଙ୍କୁ ଐଶ୍ଵର୍ଯ୍ୟାଙ୍କ ଭରଣପୋଷଣ ଲାଗି ମାସିକ ଭତ୍ତା ଦେବାକୁ ନିର୍ଦେଶ ଦେଇଛନ୍ତି।
କୋର୍ଟଙ୍କ ଆଦେଶ ମୁତାବକ, ତେଜପ୍ରତାପ ସ୍ତ୍ରୀ ଐଶ୍ଵର୍ଯ୍ୟାଙ୍କୁ ମାସିକ ୨୨ ହଜାର ଟଙ୍କା ଭରଣପୋଷଣ ବାବଦରେ ପ୍ରଦାନ କରିବେ। ଏହା ବ୍ୟତୀତ ଐଶ୍ଵର୍ଯ୍ୟା ଛାଡ଼ପତ୍ର ମାମଲା ଲଢ଼ିବାରେ ଯେଉଁ ଖର୍ଚ୍ଚ ହେବ ତାହା ମଧ୍ୟ ତେଜପ୍ରତାପ ବହନ କରିବେ ବୋଲି କୋର୍ଟ କହିଛନ୍ତି। ଏହ ବାବଦରେ ଐଶ୍ଵର୍ଯ୍ୟାଙ୍କୁ ୨ ଲକ୍ଷ ଟଙ୍କା ପ୍ରଦାନ କରିବାକୁ କୋର୍ଟ ଆଦେଶ ଦେଇଛନ୍ତି। ସୂଚନାଯୋଗ୍ୟ, ଲାଲୁଙ୍କ ବୋହୂ ଐଶ୍ଵର୍ଯ୍ୟା ଗତ ନଭେମ୍ବର ୩ ତାରିଖରେ ପାଟନାସ୍ଥିତ ଫ୍ୟାମିଲି କୋର୍ଟରେ ଭରଣପୋଷଣ ପିଟିଶନ ଦାଖଲ କରିଥିଲେ। ଗତ ୧୭ ତାରିଖରେ ଏହି ମାମଲାର ଶୁଣାଣି ହେବା ସମୟରେ ଶ୍ଵଶୁର ଘର ଲୋକେ ତାଙ୍କୁ ଘରୁ ବାହାର କରିଦେଇଥିବା କହିଥିଲେ। ଏହା ସହିତ ତେଜପ୍ରତାପ ତାଙ୍କ ସାଥୀରେ ନ ରହି ଅଲଗା ରହୁଥିବା ମଧ୍ୟ ଐଶ୍ଵର୍ଯ୍ୟା କୋର୍ଟଙ୍କୁ ଜଣାଇଥିଲେ।
