ନୂଆଦିଲ୍ଲୀ: ଭାରତରେ କରୋନା ମହାମାରୀର ସଙ୍କଟ ପୁଣି ବଢିବାରେ ଲାଗିଛି। ମହାମାରୀ ପାଇଁ ସମସ୍ତ କ୍ଷେତ୍ରରେ ଗଭୀର କ୍ଷତି ହୋଇଛି। ଚାକିରିଆଙ୍କ ଉପରେ ମଧ୍ୟ ଏହାର ଖରାପ ପ୍ରଭାବ ପଡ଼ିଛି। କେତେକ କ୍ଷେତ୍ରରେ ଲୋକେ ଚାକିରୀ ହରାଇଥିବା ବେଳେ ଆଉ କେତେକ କ୍ଷେତ୍ରରେ ଚାକିରିଆମାନଙ୍କ ଦରମା କଟାଯାଉଛି। ମହାମାରୀ ପାଇଁ ଦେଖାଦେଇଥିବା ଆର୍ଥିକ ସଙ୍କଟ କେତେ ସମସ୍ୟା ସୃଷ୍ଟି କରିଛି ସେ ସମ୍ବନ୍ଧରେ ଏକ ତଥ୍ୟ ସାମ୍ନାକୁ ଆସିଛି।
ଆମେରିକାର ପ୍ୟୁ ରିସର୍ଚ୍ଚ ସେଣ୍ଟର ରିପୋର୍ଟ ଅନୁସାରେ, ମହାମାରୀ କାରଣରୁ ଭାରତରେ ୩୨ ମିଲିୟନ ଅର୍ଥାତ୍ ୩ କୋଟି ୨୦ ଲକ୍ଷ ଲୋକ ଭାରତୀୟ ମଧ୍ୟବିତ୍ତ ବର୍ଗରୁ ବାହାରି ଯାଇଛନ୍ତି। ରିପୋର୍ଟ ଅନୁସାରେ, ଗୋଟିଏ ଦିନରେ ୧୦ରୁ ୨୦ ଡଲାର ଆୟ କରୁଥିବା ଭାରତୀୟଙ୍କ ସଂଖ୍ୟାରେ ହ୍ରାସ ଘଟିଛି, ଫଳରେ ୩ କୋଟି ୨୦ ଲକ୍ଷ ଭାରତୀୟ ମଧ୍ୟବିତ୍ତ ଶ୍ରେଣୀରୁ ବାହାର ହୋଇଯାଇଛନ୍ତି।
ସୂଚନାଯୋଗ୍ୟ, ଗତ କିଛି ବର୍ଷ ମଧ୍ୟରେ ଭାରତରେ ମଧ୍ୟବିତ୍ତ ଶ୍ରେଣୀରେ ବୃଦ୍ଧି ଘଟିଥିଲା। ୨୦୧୧ରୁ ୨୦୧୯ ମଧ୍ୟରେ ୫୭୦ ଲକ୍ଷ ଲୋକ ମଧ୍ୟମ ଆୟ ବର୍ଗରେ ସାମିଲ ହୋଇଥିଲେ। କରୋନା କାଳ ପୂର୍ବରୁ ଦେଶର ୯୯୦ ଲକ୍ଷ ଲୋକ ମଧ୍ୟବିତ୍ତ ଶ୍ରେଣୀରେ ଥିଲେ। ମାତ୍ର ବର୍ଷେ ପରେ ଏହି ସଂଖ୍ୟା ୬୬୦ ଲକ୍ଷକୁ ଖସିଆସିଛି। ଏହି ସଙ୍କଟ ସମୟରେ ପଡ଼ୋଶୀ ଦେଶ ଚୀନ୍ ତୁଳନାରେ ଭାରତରେ ମଧ୍ୟବିତ୍ତ ଶ୍ରେଣୀ ଲୋକଙ୍କ ସଂଖ୍ୟା ଅଧିକ ହ୍ରାସ ପାଇଛି।
Comments are closed.