କରୋନା : ଆଇଆଇଟି ଖଡଗପୁର ପ୍ରସ୍ତୁତ କରିବ ପିପିଇ, ରାପିଡ ଟେଷ୍ଟ କିଟ୍

କୋଲକାତା : ଆଇଆଇଟି ଖଡଗପୁର କରୋନା ଭୂତାଣୁ ଉପରେ ଗବେଷଣା ସହ ପ୍ରସ୍ତୁତ କରିବ ପିପିଇ, ରାପିଡ ଟେଷ୍ଟ କିଟ। ସେଥିପାଇଁ କର୍ତୃପକ୍ଷ ଅର୍ଥ ବ୍ୟବସ୍ଥା କରିଛନ୍ତି।

କରୋନା ସଂକ୍ରମଣକୁ ନେଇ ଲୋକଙ୍କ ମଧ୍ୟରେ ଭୟର ବାତାବରଣ ସୃଷ୍ଟି ହୋଇଥିବା ବେଳେ ଏଥିରେ ସଂକ୍ରମିତ ରୋଗୀଙ୍କ ଚିକିତ୍ସା କରୁଥିବା ଡାକ୍ତର, ନର୍ସ ଓ ପାରମାଡିକାଲ କର୍ମଚାରୀଙ୍କ ସୁରକ୍ଷା ଚିନ୍ତାର କାରଣ ହୋଇଛି। ଆବଶ୍ୟକ ପିପିଇ ଓ ସୁରକ୍ଷା କିଟ ଅଭାବ ଦେଖାଦେଉଥିବାରୁ ଏଥିରେ ସହଯୋଗ କରିବାକୁ ଆଇଆଇଟି ଖଡଗପୁର ଆଗେଇ ଆସିଛି।  ସ୍ବାସ୍ଥ୍ୟକର୍ମୀଙ୍କ ପାଇଁ ବଡି ସୁଟ, ପିପିଇ, ରାପିଡ ଡାଇଗ୍ନୋଷ୍ଟିକ କିଟ ସମେତ ଅନ୍ୟାନ୍ୟ ସାମଗ୍ରୀ ପ୍ରସ୍ତୁତ କରିବାକୁ ଯୋଜନା କରିଛି। ତିନିରୁ ଚାରି ସପ୍ତାହ ମଧ୍ୟରେ ଏସବୁ କିଟ ଯୋଗାଣ ହୋଇଯିବ ବୋଲି ସଂସ୍ଥା ଆଶା ରଖିଛି। ମାନବ ସମ୍ବଳ ବିକାଶ ମନ୍ତ୍ରୀ ପୋଖରିଆଲ ନିଶାଙ୍କ ଏଭଳି ଉଦ୍ୟମକୁ ପ୍ରଶଂସା କରିବା ସହ ଆଇଆଇଟି ଖଡଗପୁରର ଏହି କାର୍ଯ୍ୟ କରୋନା ସହ ଦେଶର ଲଢ଼େଇରେ ସହାୟକ ହେବ ବୋଲି ଆଶା କରିଛନ୍ତି।