ସମାଜ ଡିଜିଟାଲ ଡେସ୍କ: କନଷ୍ଟେବଳ ଶୁଭମିତ୍ରା ହତ୍ୟା ମାମଲାରେ ନୂଆ ତଥ୍ୟ ସାମ୍ନାକୁ ଆସିଛି। ଅଭିଯୁକ୍ତ ତଥା ହତ୍ୟାକାରୀ ଦୀପକ ରାଉତ ଶୁଭମିତ୍ରାଙ୍କୁ ହତ୍ୟା କରିବା ପରେ ୬ ତାରିଖ ଦିନ ଡ୍ୟୁଟିକୁ ଆସିଥିଲା। କମିଶସନର ଅଫିସରେ ଆକାଉଣ୍ଟାଣ୍ଟ ଭାବେ କାମ କରୁଥିବା ଦୀପକ ନିଜ କାରରେ ଶୁଭମିତ୍ରାଙ୍କ ମୃତଦେହ ରଖି ପାର୍କିଂରେ ଗାଡ଼ି ରଖିଥିଲା ଏବଂ କମିଶନରଙ୍କ କାର୍ଯ୍ୟାଳୟରେ ଡ୍ୟୁଟି କରିଥିଲା ବୋଲି ପୁଲିସ କହିଛି। ଅନ୍ୟପଟେ ଏହି ମାମଲାରେ ଦୀପକ ଗିରଫ ହେବା ପରେ ତାଙ୍କୁ ପୁଲିସ ବିଭାଗ ପକ୍ଷରୁ ନିଲମ୍ବିତ କରାଯାଇଛି।
ସୂଚନାଯୋଗ୍ୟ, ଦୀପକଙ୍କ ପ୍ରଥମ ପତ୍ନୀଙ୍କ ମୃତ୍ୟୁ ପରେ ଟ୍ରାଫିକ କନଷ୍ଟେବଳ ଶୁଭମିତ୍ରାଙ୍କୁ କୋର୍ଟରେ ବିବାହ କରିଥିଲେ। ପରବର୍ତ୍ତୀ ସମୟରେ ଟଙ୍କାକୁ ନେଇ ଉଭୟଙ୍କ ମଧ୍ୟରେ ଝଗଡ଼ା ହେବାରୁ ଦୀପକ ତାଙ୍କୁ ତଣ୍ଟିଚିପି ହତ୍ୟା କରିଥିଲେ। ଭୁବନେଶ୍ଵରରେ ହତ୍ୟା କରିବା ପରେ କେନ୍ଦୁଝରର ଘଟଗାଁ ଥାନା ଅଞ୍ଚଳରେ ମୃତେଦେହକୁ ପୋତିଦେଇଥିଲେ। ଏହି ଘଟଣାରେ ପୁଲିସ ଦୀପକଙ୍କୁ ଗିରଫ କରିବା ସହିତ ଅନ୍ୟ ଦୁଇ ସହଯୋଗୀଙ୍କୁ ଅଟକ ରଖିଛି।
