ଭୁବନେଶ୍ୱର: ପୂର୍ବରୁ ଓଡ଼ିଶା ପ୍ରଦେଶ କଂଗ୍ରେସ କମିଟି କରୋନା ସମୟରେ ଔଷଧ ନିଗମ ଦ୍ୱାରା ଜିନିଷପତ୍ର କିଣାରେ ୬ଟି ଅଭିଯୋଗ ଆଣିଥିଲା। ସେ ସବୁ ଅଭିଯୋଗର ସ୍ପଷ୍ଟିକରଣ ଆଜିପର୍ଯ୍ୟନ୍ତ ପର୍ଯ୍ୟନ୍ତ ରାଜ୍ୟ ସରକାର ଦେଲେ ନାହିଁ। ଅପରନ୍ତୁ ବିଜେଡ଼ି ଦଳର ମୁଖପାତ୍ର ଯେଉଁ ସ୍ପଷ୍ଟିକରଣ ଦେଲେ ତାହା ମିଥ୍ୟା ଓ ଅସତ୍ୟ ଉପରେ ଆଧାରିତ। ଆଜି ଆଉ ଏକ ଅଭିଯୋଗର ଫର୍ଦ୍ଦ ଆଣିଛି କଂଗ୍ରେସ। ଏକ ସାମ୍ବାଦିକ ସମ୍ମିଳନୀରେ କଂଗ୍ରେସ ନେତା ସୁଦର୍ଶନ ଦାସ ଔଷଧ ନିଗମ ଦ୍ୱାରା ନେବୁଲାଇଜର କିଣାରେ ବ୍ୟାପକ ଅନିୟମିତତାର ପର୍ଦାଫାସ କରିଛନ୍ତି। ଏକ ନିର୍ଦ୍ଦିଷ୍ଟ କମ୍ପାନୀ ଏହି ନେବୁଲାଇଜର କିଣିବାପାଇଁ ମାର୍ଚ୍ଚ ୨୧ ତାରିଖରେ ପ୍ରତି ନେବୁଲାଇଜର ପିଛା ୩୧୦୦ ଟଙ୍କାର କ୍ୱୋଟେସନ ଦେଇଥିଲା। ଏହି ସମାନ କମ୍ପାନୀ ପୁଣିଥରେ ମାର୍ଚ୍ଚ ୨୩ ତାରିଖରେ ଏହାକୁ ବଢ଼ାଇ ୫୯୦୦ ଟଙ୍କାର କ୍ୱୋଟେସନ ଦେଲା ଏବଂ ପରେ ମାର୍ଚ୍ଚ ୨୫ ତାରିଖ ଦିନ ଔଷଧ ନିଗମ ପ୍ରତି ନେବୁଲାଇଜର ପିଛା ୫୯୦୦ ଟଙ୍କା ହିସାବରେ ୫୦୦ ପିସ୍ର ସେହି କମ୍ପାନୀକୁ ଅର୍ଡର ଦେଲେ। କେଉଁ ପ୍ରରିପ୍ରେକ୍ଷୀରେ ନେବୁଲାଇଜର ଦାମ୍କୁ ୩୧୦୦ ଟଙ୍କାରୁ ୫୯୦୦ ଟଙ୍କାକୁ ବଢ଼ାଇ ଦିଆଗଲା ଏବଂ ସେହି ଦାମ୍ରେ ଔଷଧ ନିଗମ ୫୦୦ ପିସ୍ କିଣିଲେ ତାର ଜବାବ ରାଜ୍ୟ ସରକାର ଦେବେକି? ପୁନଶ୍ଚ ଆଉ ଏକ ଆଶ୍ଚର୍ଯ୍ୟର କଥା ହେଉଛି ସେହି ମାର୍ଚ୍ଚ ୨୫ ତାରିଖରେ ଆଉ ଏକ କମ୍ପାନୀ ପାଖରୁ ଔଷଧ ନିଗମ ସମାନ ଧରଣର ନେବୁଲାଇଜର କିଣିଛନ୍ତି। ମାତ୍ର ତାର ଦାମ୍ ୧୬୦୦ ଟଙ୍କା। ଏ ମଧ୍ୟ ଆଉ ଏକ ଘୋଟାଲାର ପ୍ରମାଣ ଦେଉଛି। ଗୋଟିଏ ଦିନରେ ଗୋଟିଏ କମ୍ପାନୀ ଠାରୁ ୫୯୦୦ ଟଙ୍କାରେ ନେବୁଲାଇଜର କିଣିଲାବେଳେ ଆଉ ଏକ କମ୍ପାନୀଠାରୁ କିପରି ୧୬୦୦ ଟଙ୍କାରେ ଏହା କିଣାଗଲା ତାର ଜବାବ୍ ସରକାର ଦେବେକି ବୋଲି କଂଗ୍ରେସ ନେତା ସୁଦର୍ଶନ ଦାସ ପ୍ରଶ୍ନ ଉଠାଇଛନ୍ତି।
Popular Categories
Previous article
Next article