ହରଭଙ୍ଗା : ବୌଦ୍ଧ ଜିଲ୍ଲା ହରଭଙ୍ଗା ବ୍ଲକ ପୁରୁଣାକଟକ ସ୍ଥିତ ଭୈରବୀ ଡିଗ୍ରୀ କଲେଜରେ ଛାତ୍ର ଅଶାନ୍ତି ଦିନକୁ ଦିନ ବଢିବାରେ ଲାଗିଛି । ୫ଦିନ ତଳେ ବିଶ୍ୱବିଦ୍ୟାଳୟ ନାମଲେଖା ଫି’ ବାବଦରେ କଲେଜ କର୍ତ୍ତୃପକ୍ଷ ପ୍ରଥମ ବର୍ଷ ଛାତ୍ର ଛାତ୍ରୀଙ୍କ ଠାରୁ ନିର୍ଦ୍ଧାରିତ ଫି’ ରୁ ଅଧିକ ଅର୍ଥ ଆଦାୟକୁ ବିରୋଧ କରି ଛାତ୍ରଛାତ୍ରୀ ଉପଜିଲ୍ଲାପାଳଙ୍କୁ ଦାବିପତ୍ର ପ୍ରଦାନ କରିଥିଲେ। ପୁଣି ବୁଧବାର ବର୍ଦ୍ଧିତ ଫି’କୁ ବିରୋଧ କରି ମହାବିଦ୍ୟାଳୟର ଯୁକ୍ତ ୩ ଶେଷ ବର୍ଷର ଛାତ୍ରଛାତ୍ରୀ ରାଜରାସ୍ତାକୁ ଓହ୍ଲାଇ ଥିବା ଦେଖିବାକୁ ମିଳିଥିଲା। ଛାତ୍ରଛାତ୍ରୀ ଖୋର୍ଦ୍ଧା-ବଲାଙ୍ଗିର ୫୭ନଂ ଜାତୀୟ ରାଜପଥ ଅବରୋଧ ଯୋଗୁଁ ରାସ୍ତାର ଉଭୟ ପାର୍ଶ୍ବରେ ଶତାଧିକ ଗାଡି ଅଟକି ରହିଥିଲା। ବସ୍ ଯାତ୍ରୀ ମାନେ ବହୁ ଅସୁବିଧାର ସମ୍ମୁଖୀନ ହୋଇଥିଲେ।
ସୂଚନାନୁସାରେ ଭେରବୀ ଡିଗ୍ରୀ ମହାବିଦ୍ୟାଳୟରେ ଯୁକ୍ତ ୩ ଶେଷ ବର୍ଷର ଇତିହାସ ବିଭାଗ, ଓଡିଆ ବିଭାଗ, ଇଂରାଜୀ ବିଭାଗ, ରାଜନୀତି ବିଞାନ ବିଭାଗ, ଶିକ୍ଷା ବିଭାଗରେ ମୋଟ ୨୩୦ ଜଣ ଛାତ୍ରଛାତ୍ରୀ ପଢୁଛନ୍ତି । ଶେଷ ବର୍ଷର ଛାତ୍ରଛାତ୍ରୀଙ୍କ ନାମଲେଖା ଫି’ ବାବଦରେ ୩୨ଶହ ଟଙ୍କା ଏବଂ ୫ମ ସେମିଷ୍ଟାର ଫର୍ମ ପୂରଣ ଫି’ ବାବଦରେ ୧୬୨୦ ଟଙ୍କା କଲେଜ ପକ୍ଷରୁ ବିଞ୍ଜପ୍ତି ଜାରି ହୋଇଥିଲା। ନିର୍ଦ୍ଧାରିତ ଫି ଠାରୁ ଅଧିକ ଅର୍ଥ ଆଦାୟକୁ ବିରୋଧ କରି ଶେଷ ବର୍ଷର ଛାତ୍ରଛାତ୍ରୀ ଏନଏଚ ୫୭ ରାସ୍ତା ରୋକ କରିଥିଲେ । ପ୍ରାୟ ୧ଘଣ୍ଟା ପର୍ଯ୍ୟନ୍ତ ଉଭୟ ପଟରେ ଗାଡି ଅଟକି ରହିଥିଲା। ଶେଷରେ ମହାବିଦ୍ୟାଳୟ ଅଧ୍ୟକ୍ଷ ରମେଶଚନ୍ଦ୍ର ତାରେଣିଆ ଘଟଣାସ୍ଥଳରେ ପହଂଚି ଛାତ୍ରଛାତ୍ରୀଙ୍କ ସହ ଆଲୋଚନା କରିଥିଲେ। ଏହା ସହ ନାମଲେଖା ଫିକୁ ୨୯ ଶହ ଏବଂ ଫର୍ମ ଫିଲପ ଫିକୁ ୬ଶହ୯ଟଙ୍କା କମ କରିବା ପାଇଁ ପ୍ରତିଶ୍ରୁତି ଦେବା ପରେ ରାସ୍ତା ରୋକ ହଟିଥିଲା। ଏ ସମ୍ପର୍କରେ ମହାବିଦ୍ୟାଳୟ ଅଧ୍ୟକ୍ଷଙ୍କୁ ପଚାରିବାରୁ ଚଳିତ ବର୍ଷ ୩ଶହ ଟଙ୍କା ଫି’ ବୃଦ୍ଧି ହୋଇଛି । ଛାତ୍ରଛାତ୍ରୀ ତାହା ବିରୋଧ କରୁଛନ୍ତି। ଆମେ ଉପ ଜିଲ୍ଲାପାଳଙ୍କୁ ସୂଚନା ଦେଇଛୁ ଉପ ଜିଲ୍ଲାପାଳ ଯାହା ନିଷ୍ପତ୍ତି ନେବେ। ସୂଚନା ଥାଉକି କିଛିଦିନ ତଳେ ବିଶ୍ୱବିଦ୍ୟାଳୟ ନାମଲେଖା ଫି ବାବଦରେ କଲେଜ କର୍ତ୍ତୃପକ୍ଷ ପ୍ରଥମ ବର୍ଷ ଛାତ୍ର ଛାତ୍ରୀଙ୍କ ଠାରୁ ଜଣ ପିଛା ୫୦୦ ଲେଖାଏଁ ଆଦାୟ କରିଥିଲେ। କଲେଜ କର୍ତ୍ତୃପକ୍ଷ ଓ ଜନୈକ କର୍ମଚାରୀ ଛୁଟିଦିନରେ ମିଛ ସୂଚନା ଦେଇ ପଇସା ଦାଖଲ କରିବାକୁ ବାଧ୍ୟ କରିଥିଲେ। ଉପଜିଲ୍ଲାପାଳଙ୍କ ନିର୍ଦ୍ଧେଶ କ୍ରମେ କଲେଜ କର୍ତ୍ତୃପକ୍ଷ ଛାତ୍ରଛାତ୍ରୀଙ୍କ ବେକୟା ଟଙ୍କା ଫେରସ୍ତ କରିଥିଲେ। ବାରମ୍ବାର କଲେଜରେ ଏଭଳି ଅର୍ଥ ଆଦାୟ ଅଭିଯୋଗ ଆସିବା ଦ୍ୱାରା କଲେଜର ନାଁ ବଦନାମ ହେଉଥିବା ବୁଦ୍ଧିଜୀବି ମହଲରେ ମତ ପ୍ରକାଶ ପାଉଛି । ଏଭଳି ଘଟଣାର ମାଷ୍ଟରମାଇଣ୍ଡ କିଏ କାହା ପ୍ରରୋଚନାରେ ବେନିୟମ ଅର୍ଥ ଆଦାୟ ହେଉଛି ଖୋଳ ତାଡ ପାଇଁ ଦାବି ଉଠୁଛି। ଏଥିପ୍ରତି ଜିଲ୍ଲାପାଳ ସ୍ୱତନ୍ତ୍ର ଦୃଷ୍ଟି ଦେବାକୁ ସାଧାରଣରେ ଦାବି ହେଉଛି।
Comments are closed.