ଗୁରୁଡିଝାଟିଆ: କଟକିଆସାହି ପଞ୍ଚାୟତର ବନ୍ଧହଟାରୁ ସାପୁଆ ଉପରେ କେଉଟପଡାରେ ସଂଯୋଗ କରିବାକୁ ଥିବା ଅର୍ଦ୍ଧନିର୍ମିତ ସେତୁର ଅନୁଧ୍ୟାନ କରିଛନ୍ତି ଜିଲ୍ଲାପାଳ ଭବାନୀ ଶଙ୍କର ଚଇନି। ୨୦୧୩ ମସିହାରୁ ନିର୍ମିତ ହୋଇଥିବା ଏହି ସେତୁଟି ଯୋଗାଯୋଗ ଦୃଷ୍ଟିରୁ ବେଶ ଉପଯୋଗୀ। ସେଥିପାଇଁ ରାଜ୍ୟ ସରକାର ସେତୁ ନିର୍ମାଣ ପାଇଁ ଅର୍ଥରାଶି ବରାଦ କରିଛନ୍ତି। ହେଲେ ୮ବର୍ଷ ହେଲା ସେତୁଟି ନିର୍ମିତ ହୋଇଥିଲେ ମଧ୍ୟ ସେତୁକୁ ସଂଯୋଗ କରୁଥିବା ରାସ୍ତାର ଅଗ୍ରଗତି ହେଇପାରୁନାହିଁ। ଏଥିରେ ବାଧକ ସୃଷ୍ଟି କରିଛି ଜମି ଅଧିଗ୍ରହଣ। ୨୯୦ ମିଟର ରାସ୍ତା ହେବା ସହ ଏହାର ଓସାର ୪୦ଫୁଟ ହେବ। କେତେକ ଜମି ମାଲିକ ଏହାଦ୍ୱାରା କ୍ଷତିଗ୍ରସ୍ତ ହେବାକୁ ଥିବାରୁ ତୁରନ୍ତ ନିୟମ ଅନୁଯାୟୀ ଜମି ଅଧିଗ୍ରହଣ କରି କ୍ଷତିଗ୍ରସ୍ତ ଜମିହରାଙ୍କୁ ଉଚିତ୍ ପ୍ରାପ୍ୟ ଦେବା ପାଇଁ ଜିଲ୍ଳାପାଳ ଶ୍ରୀ ଚଇନି ଗ୍ରାମ୍ୟ ଉନ୍ନୟନ ବିଭାଗର ଅଧିକ୍ଷଣ ଯନ୍ତ୍ରୀଙ୍କୁ ନିର୍ଦ୍ଦେଶ ଦେଇଥିଲେ। ପ୍ରକାଶଯୋଗ୍ୟ ସେତୁ ଓ ରାସ୍ତା ନିର୍ମାଣ ଦାୟିତ୍ୱରେ ଥିବା ବିଭାଗୀୟ ଯନ୍ତ୍ରୀଙ୍କ ଉଦାସୀନତା, ଟାଳଟୁଳ ନୀତି ପାଇଁ କ୍ଷୋଭ ପ୍ରକାଶ କରିବା ସହିତ ଜିଲ୍ଲାପାଳଙ୍କ ଦୃଷ୍ଟି ଆକର୍ଷଣ କରିଥିଲେ। ଏହି ଗସ୍ତ ସମୟରେ ଅତିରିକ୍ତ ଜିଲ୍ଲାପାଳ ପୂର୍ଣ୍ଣଚନ୍ଦ୍ର ମିଶ୍ର, କଟକ ଜିଲ୍ଲା ଜମି ଗ୍ରହଣ ଅଧିକାରୀ, ଆଠଗଡ ଉପଜିଲ୍ଲାପାଳ ଅଜାମ୍ବର ମହାନ୍ତି, ତହସିଲଦାର ତପନ କୁମାର ଖୁଣ୍ଟିଆ, ନିଧିପୁର ରାଜସ୍ୱ ନିରୀକ୍ଷକ ସୁଚନ୍ଦ୍ର ମହାନ୍ତି, ଗ୍ରାମ୍ୟ ଉନ୍ନୟନ ବିଭାଗର ସମସ୍ତ ଜିଲ୍ଲାସ୍ତରୀୟ ଅଧିକାରୀ ଉପସ୍ଥିତ ରହିଥିଲେ। ଏପରିକି ଜଗମୋହନପୁର, କେଉଟପଡା ଅତ୍ୟନ୍ତ ବିପର୍ଯ୍ୟସ୍ତ ହୋଇଥିବା ଦେଖି ତୁରନ୍ତ ଏହାକୁ କଂକ୍ରିଟ କରିବା ନିମନ୍ତେ ନିର୍ଦ୍ଦେଶ ଦେଇଛନ୍ତି।
