ଚୌଦ୍ୱାର : ଚୌଦ୍ୱାରର ପ୍ରସିଦ୍ଧ ରୂପଯାତ୍ରା ବୁଧବାର ଦିନ ଉଦଯାପିତ ହୋଇଯାଇଥିବା ବେଳେ ଶୁକ୍ରବାର ସୁଦ୍ଧା ଯାତ୍ରା ପଡ଼ିଆରେ ଲୋକଙ୍କ ଗହଳି କମିବାରେ ନାଁ ଧରୁନି । ବ୍ୟବସାୟୀ ମାନେ ଫେରିବା ପାଇଁ ନିଜ ନିଜର ପସରା ବନ୍ଧାବନ୍ଧି ଆରମ୍ଭ କରିଥିବା ବେଳେ ଜନ ଗହଳି ଦେଖି ଶେଷ ବେଳରେ ଆଉକିଛି ବ୍ୟବସାୟ କରିବାର ଲାଳସାକୁ ହାତଛଡ଼ା କରୁ ନାହାନ୍ତି । ଯାତ୍ରାରୁ ନାନାଦି ଘରକରଣା ସାମଗ୍ରୀ କିଣିବା ପାଇଁ ଲୋକମାନେ ଯାତ୍ରା ପଡ଼ିଆରେ ଗହଳି କରୁଛନ୍ତି । ବର୍ଷକ ପାଇଁ ଝାଡୁ, ପହଁରା, କୁଲା, ବାଉଁସିଆ ଆଦି ଘର କରଣା ଜିନିଷ କିଣିବା ପାଇଁ ମେଲଣ ପଡିଆରେ ଶୁକ୍ରବାର ଦିନସାରା ଭିଡ଼ ଲାଗିରହିଥିବା ଦେଖିବାକୁ ମିଳିଛି। ଏହାକୁ ଦେଖି ଦୂରଦୂରାନ୍ତରୁ ଆସିଥିବା ଚଟପଟି ଖାଦ୍ୟ ବ୍ୟବସାୟୀ ମାନେ ବ୍ୟବସାୟ ଆଶାରେ ପସରା ଖୋଲା ରଖିଛନ୍ତି। ଯାତ୍ରୀଙ୍କ ଆଗମନକୁ ଦେଖି ଗୁରୁବାର ସଂନ୍ଧ୍ୟାରେ ରୂପଯାତ୍ରା କମିଟି ତରଫରୁ ସାଂସ୍କୃତିକ କାର୍ଯ୍ୟକ୍ରମ ଆୟୋଜନ କରାଯାଇଥିଲା । ଏଥି ସହିତ ଯାତ୍ରାରେ ସହଯୋଗ କରିଥିବା ବିଭିନ୍ନ ବିଭାଗର କର୍ମଚାରୀ ମାନଙ୍କୁ କମିଟି ପକ୍ଷରୁ ସମ୍ବର୍ଦ୍ଧିତ କରାଯାଇଥିଲା। ବିଦ୍ୟୁତ୍ ବିଭାଗ ତରଫରୁ ଶୁକ୍ରବାର ଦିନ ଯାତ୍ରା ପଡ଼ିଆରେ ବିଦ୍ୟୁତ୍ ସଂଯୋଗ ବିଚ୍ଛିନ୍ନ କରାଯାଇଛି। ଚୌଦ୍ୱାର ରୁପଯାତ୍ରା ପରେ ଢେଙ୍କାନାଳ ପ୍ରସିଦ୍ଧ ଗଜଲକ୍ଷ୍ମୀ ପୁଜା ଯାତ୍ରାକୁ ଯିବାପାଇଁ ବଡ ବ୍ୟବସୟୀ ମାନେ ପ୍ରସ୍ତୁତ ହେଉଥିବା ଚକ୍ରିଦୋଳିର ମାଲିକ ସୁଦୁର ବିଶାଖାପାଟଣାରୁୁ ଆସିଥିବା କେ.ଶ୍ରୀନିବାସ କହିଛନ୍ତି । ଚଳିତବର୍ଷ ଭଲ କିଣାବିକା ହୋଇଥିବା ଟାଙ୍ଗୀ ଭଟିମୁଣ୍ଡାରୁ ଆସିଥିବା କଂସା, ପିତଳ ବାସନକୁସନ ବ୍ୟବସାୟୀମାନେ ପ୍ରକାଶ କରିଛନ୍ତି । ଅନ୍ୟପଟେ ଶିଳ, ଚକି, ଖଟ, ଜାଲ ଆଦି ବ୍ୟବସୟୀ ମାନେ ଯାତ୍ରା ସରିବାର ପ୍ରାୟ ଏକମାସ ପର୍ଯ୍ୟନ୍ତି ଚୌଦ୍ୱାରରେ ରହି ଭଲ ବ୍ୟବସାୟ କରି ନିଜ ଅଞ୍ଚଳକୁ ଫେରିବେ ବୋଲି ଜଣା ପଡ଼ିଛି ।
Comments are closed.