ବେଜିଂ : ଚୀନ୍ ଭାରତ ସହ ମିଶି କାର୍ଯ୍ୟ କରିବାକୁ ସର୍ବଦା ପ୍ରସ୍ତୁତ ଥିବା ଚୀନ୍ ବୈଦେଶିକ ମନ୍ତ୍ରଣାଳୟ କହିଛି। ଚୀନ୍ କହିଛି, ଗତମାସ ୩୦ ତାରିଖରେ ଅନୁଷ୍ଠିତ ସାଘାଇ ସହଯୋଗ ସଂଗଠନ(ଏସ୍ସିଓ) ରାଷ୍ଟ୍ର ମୁଖ୍ୟମାନଙ୍କ ବୈଠକ ଭାରତ ଆୟୋଜନ କରିଥିବାରୁ ସମସ୍ତ ସଦସ୍ୟ ରାଷ୍ଟ୍ର ତାହାର ପ୍ରଶଂସା କରିଛନ୍ତି।
ଚୀନ୍ ବୈଦେଶିକ ମନ୍ତ୍ରଣାଳୟ ମୁଖପାତ୍ର ହୁଆ ଚୁନିଙ୍ଗ୍ କହିଛନ୍ତି, ଭାରତ ଦ୍ୱାରା ଆୟୋଜିତ ଏସ୍ସିଓ ରାଷ୍ଟ୍ରମୁଖ୍ୟମାନଙ୍କ ୧୯ତମ ବୈଠକ ଭାରତ ଯେଭଳି ପରିଚାଳନା କରିଥିଲା, ସଦସ୍ୟ ରାଷ୍ଟ୍ରମାନେ ତାହାର ପ୍ରଶଂସା କରିଛନ୍ତି। ସେ କହିଛନ୍ତି, ଭାରତ ସହ ମିଶି କାର୍ଯ୍ୟ କରିବାକୁ ଚୀନ୍ ସର୍ବଦା ପ୍ରସ୍ତୁତ ରହିଛି। ୨୦୧୭ରେ ଭାରତ ଏସ୍ସିଓର ସଦସ୍ୟ ହେବା ପରଠାରୁ ପ୍ରଥମ ଥରପାଇଁ ଏହାର ଉଚ୍ଚସ୍ତରୀୟ ବୈଠକରେ ଅଧ୍ୟକ୍ଷତା କରିଛି।
ଏସ୍ସିଓ ରାଷ୍ଟ୍ରମୁଖ୍ୟମାନଙ୍କ ୧୯ତମ ବୈଠକ ଭିଡ଼ିଓ କନ୍ଫରେନ୍ସିଂ ମାଧ୍ୟମରେ ଅନୁଷ୍ଠିତ ହୋଇଥିଲା। ଏଥିରେ ବାଣିଜ୍ୟ, ପୁଞ୍ଜିନିବେଶ ଓ ସଂସ୍କୃତି ଭଳି କ୍ଷେତ୍ରରେ ସହଯୋଗ ବୃଦ୍ଧି ଉପରେ ଆଲୋଚନା କରାଯାଇଥିଲା। ବୈଠକ ଶେଷରେ ଏକ ମିଳିତ ବିବୃତ୍ତି ପ୍ରକାଶ ପାଇଥିଲା।
