ଲକ୍ଷ୍ମୀଙ୍କ କମାଲ: ୫୮ ମିନିଟରେ ପ୍ରସ୍ତୁତ କଲେ ୪୬ ପ୍ରକାର ବ୍ୟଞ୍ଜନ

ସୁସ୍ବାଦୁ ବ୍ୟଞ୍ଜନ ପ୍ରସ୍ତୁତ କରିବା ଏକ କଳା। ସମସ୍ତଙ୍କ ଦ୍ବାରା ଏହା ସମ୍ଭବ ହୋଇ ନ ଥାଏ। ତେବେ ଜଣେ ୧ ଘଣ୍ଟା ଭିତରେ କେତେ ପ୍ରକାର ବ୍ୟଞ୍ଜନ ପ୍ରସ୍ତୁତ କରିପାରିବ ? ୫ କି ୧୦ ପ୍ରକାର । କିନ୍ତୁ ତାମିଲନାଡୁର ଜଣେ ଝିଅ ଘଣ୍ଟାଏ ଭିତରେ ୪୬ ପ୍ରକାର ବ୍ୟଞ୍ଜନ ପ୍ରସ୍ତୁତ କରି ଚର୍ଚ୍ଚାକୁ ଆସିଛନ୍ତି। କମ୍‌ ସମୟ ଭିତରେ ଏତେ ପ୍ରକାର ବ୍ୟଞ୍ଜନ ପ୍ରସ୍ତୁତ କରିବାର କଳା ପାଇଁ ତାଙ୍କ ନାମକୁ ୟୁନିକୋ ବୁକ୍‌ ଅଫ୍‌ ୱାର୍ଲ୍ଡ ରେକର୍ଡ୍ସରେ ସ୍ଥାନିତ କରାଯାଇଛି।

ଏହି ଝିଅଟିର ନାମ ହେଉଛି ଏସ.ଏନ. ଲକ୍ଷ୍ମୀ ସାଇ। ଚେନ୍ନାଇରେ ମଙ୍ଗଳବାର ଆୟୋଜିତ ଏକ କାର୍ଯ୍ୟକ୍ରମରେ ସେ ମାତ୍ର ୫୮ ମିନିଟରେ ୪୬ ପ୍ରକାର ବ୍ୟଞ୍ଜନ ପ୍ରସ୍ତୁତ କରି ଏହି ସଫଳତା ହାସଲ କରିଛନ୍ତି। ତାଙ୍କର ଏହି କଳା ସମସ୍ତଙ୍କୁ ଆଶ୍ଚର୍ଯ୍ୟ କରିଛି।

ଲକ୍ଷ୍ମୀ କୁହନ୍ତି, ଏହି ସଫଳତାର ଶ୍ରେୟ ସେ ତାଙ୍କ ମା’ଙ୍କୁ ଦେଉଛନ୍ତି। କାରଣ ତାଙ୍କ ମା’ ତାଙ୍କୁ ଖାଦ୍ୟ ପ୍ରସ୍ତୁତ କରିବା ଶିଖାଇଛନ୍ତି। ଏହି ସଫଳତା ପାଇଁ ସେ ବହୁତ ଖୁସି ଅଛନ୍ତି ଏବଂ ନିଜକୁ ଗର୍ବିତ ମନେ କରୁଛନ୍ତି ବୋଲି ଲକ୍ଷ୍ମୀ କହିଛନ୍ତି।

ଲକ୍ଷ୍ମୀଙ୍କ ମା’ବାପା ଜାଣିବାକୁ ପାଇଥିଲେ ଯେ, ଏହି ରେକର୍ଡ ପୂର୍ବରୁ କେରଳର ଜଣେ ୧୦ ବର୍ଷର ବାଳିକା ସାନଭୀ ନାମରେ ରହିଛି। ସେ ୧ ଘଣ୍ଟାରେ ପ୍ରାୟ ୩୦ ପ୍ରକାର ବ୍ୟଞ୍ଜନ ପ୍ରସ୍ତୁତ କରିଥିଲେ। ତେଣୁ ଏହି ରେକର୍ଡ ଅତିକ୍ରମ କରିବା ଲାଗି ସେମାନେ ତାଙ୍କ ଝିଅକୁ ପ୍ରଶିକ୍ଷିତ କରିଥିଲେ।

Comments are closed.