ଡେସ୍କ: ଭାରତ ମହାକାଶ ଅଭିଯାନ କ୍ଷେତ୍ରରେ ଅଭୂତପୂର୍ବ ସଫଳତା ହାସଲ କରିଛି। ଚନ୍ଦ୍ରଯାନ-୩ ଅତ୍ୟନ୍ତ ସଫଳତାର ସହ ଚନ୍ଦ୍ରପୃଷ୍ଠରେ ଅବତରଣ କରିଛି। ଏହି ଅବସରରେ ଦକ୍ଷିଣ ଆଫ୍ରିକା ଗସ୍ତରେ ଥିବା ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ କହିଛନ୍ତି, ଏହି ସଫଳତା ବିକଶିତ ଭାରତର ଶଙ୍ଖନାଦ ଅଟେ।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଚନ୍ଦ୍ରଯାନ-୩ର ଅବତରଣ ମୁହୂର୍ତ୍ତକୁ ନବଭାରତର ଜୟଯାତ୍ରାର ମୁହୂର୍ତ୍ତ ବୋଲି ବର୍ଣ୍ଣନା କରିଛନ୍ତି। ସେ କହିଛନ୍ତି, ଆମେ ଯେତେବେଳେ ଆମ ଆଖି ସାମ୍ନାରେ ଇତିହାସ ରଚନା ହେଉଥିବା ଦେଖୁଛେ, ସେତେବେଳେ ଜୀବନ ଧନ୍ୟ ମନେ ହେଉଛି। ଏଭଳି ଐତିହାସିକ ଘଟଣା ଆମ ପାଇଁ ସଦା ଜାଗ୍ରତ ଚେତନାରେ ପରିଣତ ହୋଇଛି। ଏହି ମୁହୂର୍ତ୍ତ ଆମ ପାଇଁ ଅତ୍ୟନ୍ତ ସ୍ମରଣୀୟ ବୋଲି ଶ୍ରୀ ମୋଦୀ କହିଛନ୍ତି। ଏହି ମୁହୂର୍ତ୍ତ ଭାରତୀୟଙ୍କ ସାମର୍ଥ୍ୟ ପ୍ରମାଣିତ କରିଛି। ଏହି ସଫଳତା ଆମ ପାଇଁ ନୂଆ ବିଶ୍ୱାସ, ନୂଆ ଚେତନା ସୃଷ୍ଟି କରିଛି। ଭାରତର ଉଦୀୟମାନ ଭାଗ୍ୟର ଆହ୍ୱାନର ଏହା ପ୍ରତୀକ ବୋଲି ପ୍ରଧାନମନ୍ତ୍ରୀ କହିଛନ୍ତି। ଅମୃତ କାଳର ପ୍ରଥମ ଭାଗରେ ସଫଳତାର ଅମୃତ ବର୍ଷା ହୋଇଥିବା କହିବା ସହ ଶ୍ରୀ ମୋଦୀ କହିଛନ୍ତି, ଆମେ ପୃଥିବୀରେ ସଂକଳ୍ପ ଗ୍ରହଣ କଲୁ, ଚନ୍ଦ୍ରରେ ଏହାକୁ ସଫଳ କରି ଦେଖିଲୁ।
