ନୂଆଦିଲ୍ଲୀ : ବରିଷ୍ଠ ସାମ୍ବାଦିକ ତଥା ଏନ୍ ଡିଭି ମୁଖ୍ୟ ପ୍ରଣୟ ରୟ ଓ ତାଙ୍କ ପତ୍ନୀ ରାଧିକାଙ୍କ ବିରୋଧରେ ସିବିଆଇ ବୁଧବାର ମାମଲା ରୁଜୁ କରିଛି। ସେମାନେ ବୈଦେଶିକ ପୁଞ୍ଜି ବିନିଯୋଗ (ଏଫ୍ଡିଆଇ) ଆଇନର ଉଲଙ୍ଘନ କରିଥିବା ଅଭିଯୋଗକ୍ରମେ ଏହି ମାମଲା ରୁଜୁ ହୋଇଛି। ଏହି ମାମଲାରେ ଏନ୍ଡି ଟିଭିରେ ପୁଞ୍ଜି ନିବେଶ କରିଥିବା ଆଉ କିଛି ବ୍ୟକ୍ତି ଓ ଆୟକର ବିଭାଗର କିଛି ଅଧିକାରୀଙ୍କ ନାମ ରହିଛି।
ଅଭିଯୋଗ ଅନୁସାରେ ଏହି ଇଲେକ୍ଟ୍ରୋନିକ ଖବର ପ୍ରସାରଣ ସଂସ୍ଥା ଭିନ୍ନ ନାମରେ ୧୫୦ ନିୟୁତ ଡଲାରର ବୈଦେଶିକ ପାଣ୍ଠି ସଂଗ୍ରହ କରିଛି। ଆମେରିକାର ଜେନେରାଲ ଇଲେକ୍ଟ୍ରିକ୍ ମାଲିକାନାରେ ଥିବା ଏନ୍ବିସିୟୁ ସଂସ୍ଥା ମାଧ୍ୟମରେ ଏହି ଅର୍ଥ ସଂଗ୍ରହ ହୋଇଛି। ଏନ୍ଡି ଟିଭି ଟିକସ ଫାଙ୍କିବା ଓ ବିଦେଶୀ ପୁଞ୍ଜି ବିନିଯୋଗ ପାଇଁ ବ୍ରିଟେନ୍, ହଳାଣ୍ଡ, ଦୁବାଇ, ମାଲେସିଆ ଓ ମରିସସ୍ ଭଳି ବିଭିନ୍ନ ଦେଶେର ୩୨ଟି ବେନାମୀ ସଂଗଠନ ଚଳାଇଛି। ଏନ୍ଡି ଟିଭିର ପୂର୍ବତନ ସିଇଓ ବିକ୍ରମାଦିତ୍ୟ ଚନ୍ଦ୍ରାଙ୍କ ଶାମ୍ ଟ୍ରାଞ୍ଜାକ୍ସନ୍ସ ମାଧ୍ୟମରେ ଏହା ବିପୁଳ ବିଦେଶୀ ପାଣ୍ଠି ଭାରତକୁ ଆଣିଛି। ଏହି ପରିପ୍ରେକ୍ଷୀରେ ବିକ୍ରମାଦିତ୍ୟଙ୍କ ବିରୋଧରେ ଠକେଇ, ଦୁର୍ନୀତି ଆଦି ଅଭିଯୋଗକ୍ରମେ ଆପରାଧିକ ମାମଲା ରୁଜୁ କରାଯାଇଛି। ଏଥିସହିତ ବୁଧବାର ସିବିଆଇ ବିକ୍ରମଙ୍କ ଘରେ ମଧ୍ୟ ଚଢ଼ଉ କରିଛି। ଅପରପକ୍ଷରେ ଏନ୍ଡି ଟିଭି ପକ୍ଷରୁ କୁହାଯାଇଛି ଯେ ସିବିଆଇ ମାମଲା ଉଦ୍ଧେଶ୍ୟ ପ୍ରଣୋଦିତ। ବାରମ୍ବାର ତଦନ୍ତ ସତ୍ତ୍ବେ ସିବିଆଇ ଅଭିଯୋଗ ଉପରେ କୌଣସି ତଥ୍ୟପ୍ରମାଣ ଉପସ୍ଥାପନ କରିବାରେ ସମର୍ଥ ହୋଇ ନାହିଁ। ଅନେକ ଥର ତଦନ୍ତକୁ ବନ୍ଦ ମଧ୍ୟ କରାଯାଇଛି। ଏହା ଗଣମାଧ୍ୟମର କଣ୍ଠରୋଧ କରିବା ଉଦ୍ୟମ ବୋଲି ଏନ୍ଡି ଟିଭି ପକ୍ଷରୁ କୁହାଯାଇଛି।
