ନୂଆଦିଲ୍ଲୀ: ନିଟ୍ ପ୍ରଶ୍ନପତ୍ର ପ୍ରଘଟ ମାମଲାରେ କେନ୍ଦ୍ରୀୟ ତଦନ୍ତ ବ୍ୟୁରୋ (ସିବିଆଇ) ଆଉ ଜଣେ ମାଷ୍ଟର ମାଇଣ୍ଡ ସମେତ ୩ ଜଣଙ୍କୁ ଗିରଫ କରିଛି। ଅଭିଯୁକ୍ତମାନଙ୍କ ମଧ୍ୟରେ ୨ ଜଣ ଡାକ୍ତରୀ ଛାତ୍ର ଥିବା ଜଣାପଡ଼ିଛି। ଛାତ୍ର ଦୁଇଜଣ ହେଉଛନ୍ତି ମଙ୍ଗଲମ ବିଶ୍ନୋଇ ଏବଂ ଦୀପେନ୍ଦ୍ର ଶର୍ମା। ଉଭୟେ ଭରତପୁର ମେଡିକାଲ କଲେଜର ଛାତ୍ର। ଏହି ଦୁଇ ଜଣ ଗତ ମେ ୪ ତାରିଖରେ ହଜାରୀବାଗରେ ରହି ନିଟ ପ୍ରଶ୍ନପତ୍ର ସମାଧାନ କରିଥିବା ଅଭିଯୋଗ ହୋଇଛି। ଅନ୍ୟ ଅଭିଯୁକ୍ତ ହେଉଛନ୍ତି ଶଶିକାନ୍ତ ପାସଓ୍ବାନ। ପୂର୍ବରୁ ଗିରଫ ହୋଇଥିବା ପଙ୍କକ କୁମାରଙ୍କ ସହଯୋଗ ହେଉଛନ୍ତି ଶଶିକାନ୍ତ। ଏହାବ୍ୟତୀତ ଏହି ୩ ଅଭିଯୁକ୍ତ ପୂର୍ବରୁ ଗିରଫ ହୋଇଥିବା ମାଷ୍ଟର ମାଇଣ୍ଡ ସଞ୍ଜୀବ ମୁଖିଆର ଘନିଷ୍ଠ ବୋଲି ସୂଚନା ମିଳିଛି। ସୂଚନାଯୋଗ୍ୟ, ପୂର୍ବରୁ ଏହି ମାମଲାରେ ସିବିଆଇ ଏକାଧିକ ଅଭିଯୁକ୍ତଙ୍କୁ ଗିରଫ କରିଛି।
Comments are closed.