ସମ୍ବଲପୁର: ରାଜ୍ୟର ବିଭିନ୍ନ ଜିଲାରେ ବେଆଇନ ଭାବରେ ଗଞ୍ଜେଇ ଚାଷ କରାଯାଉଥିବା ବେଳେ ସେଗୁଡିକୁ ଅବୈଧ୍ୟ ରୂପେ ସମ୍ବଲପୁର ଜିଲା ଦେଇ ଦେଶର ବିଭିନ୍ନ ରାଜ୍ୟକୁ ଚାଲାଣ ହେଉଥିବାର ନଜିର ରହିଛି । ଏଣୁ ଅବକାରୀ ବିଭାଗ ପକ୍ଷରୁ ପାଟ୍ରୋଲିଂ ସମୟରେ ବୁଧବାର ଗଞ୍ଜେଇ ଚାଲାଣକାରୀମାନଙ୍କୁ ଧରିବାରେ ସଫଳ ହୋଇଛି । ପୂର୍ବାହ୍ନରେ ବିଜୁ ଏକ୍ସପ୍ରେସ ୱେ (ରାଜ୍ୟ ରାଜପଥ – ୧୦)ରେ ପାଟ୍ରୋଲିଂ ସମୟରେ ଅଇଁଠାପାଲି ଥାନାଠାରୁ କିଛି ଦୂରରେ ଏକ ସନ୍ଦିଗ୍ଧ କାରକୁ ଅଟକାଯାଇଥିଲା । କାରକୁ ଯାଞ୍ଚ କରିବା ସମୟରେ ଗାଡି ମଧ୍ୟରେ ଲୁକ୍କାୟିତ ଭାବରେ ରଖାଯାଇଥିବା ୫୩ କିଗ୍ରା ଗଞ୍ଜେଇ ଜବତ କରାଯାଇଥିଲା । ଏଣୁ ଗଞ୍ଜେଇ, କାର ଏବଂ ଗୋଟିଏ ମୋବାଇଲ ଫୋନକୁ ଜବତ କରିବା ସହିତ ୨ ଜଣ ଚାଲାଣକାରୀ ମଧ୍ୟପ୍ରଦେଶ ଦତିଆ ଜିଲା ନିବାସୀ ସଞ୍ଜୀବ ପୁରୋହିତ (୫୪) ଓ କମଲ କିଶୋର (୩୪) ଙ୍କୁ ଗିରଫ କରାଯାଇଛି।
ଜବତ ହୋଇଥିବା ଗଞ୍ଜେଇ ଓ କାରର ଆନୁମାନିକ ମୂଲ୍ୟ ୧୦ ଲକ୍ଷ ଟଙ୍କାରୁ ଊର୍ଦ୍ଧ୍ବ ହୋଇଥିବା ବେଳେ ଚାଲାଣକାରୀ ମାନେ ଅଧିକ ଲାଭ ଆଶାରେ ଏହି ଗଞ୍ଜେଇକୁ ବୌଦ୍ଧ ଜିଲାରୁ ମଧ୍ୟପ୍ରଦେଶ ରାଜ୍ୟର ଦତିଆ ଜିଲାକୁ ଚାଲାଣ କରୁଥିବା ଅବକାରୀ ଦଳକୁ କହିଥିଲେ । ଏଣୁ ଏକ ମାମଲା ରୁଜୁ କରି ଚାଲାଣକାରୀମାନଙ୍କୁ ଗିରଫ କରି ଅଦାଲତକୁ ଅବକାରୀ ବିଭାଗ ଚାଲାଣ କରିଛି ବୋଲି ସୁଚନା ଦେଇଛି।
