ନୂଆଦିଲ୍ଲୀ : ଯଦି ପିଇବା ପାଣିରେ ଆପଣ ଗାଡି ସଫା କରୁଛନ୍ତି ତେବେ ଆପଣ ହଇରାଣରେ ପଡିପାରନ୍ତି । ଏମିତି କଲେ ଆପଣଙ୍କୁ ଭାରି ଜରିମାନା ଭରିବାକୁ ପଡିପାରେ । ଗୁରୁଗ୍ରାମରେ ପାନୀୟ ଜଳରେ କାର୍ ଧୋଇଲେ ୫ ହଜାର ଟଙ୍କାର ଜରିମାନା ଲାଗିପାରେ । ଗୁରୁଗ୍ରାମର ଏମସିଜି ଏନେଇ ଘୋଷଣା କରିଛି କି ଅଞ୍ଚଳରେ ଗମ୍ଭୀର ଜଳ ସଙ୍କଟ ମଧ୍ୟରେ ଲୋକମାନେ ଜଳ ନଷ୍ଟ କରିବାକୁ ଚେଷ୍ଟା କଲେ ସେମାନଙ୍କୁ ଜରିମାନା ଭରିବାକୁ ପଡିପାରେ । ଦିଲ୍ଲୀ-ଏନସିଆର ଆଇଟି ହବରେ ଅନେକ ଘରୁ ପାଣି ସପ୍ଲାଇରେ ହ୍ରାସ ନେଇ ଅଭିଯୋଗ ହୋଇଆସୁଥିଲା ।
ଗୁରୁଗ୍ରାମର ନଗର ନିଗମ ଲୋକଙ୍କୁ ପ୍ରତିଦିନ ସକାଳ ୫ଟାରୁ ୯ଟା ମଧ୍ୟରେ ନିଜ ଗାଡିକୁ ପିଇବା ପାଣିରେ ନଧୋଇବା ପାଇଁ ଆଗ୍ରହ କରିଛି । ଯଦି ଲୋକମାନେ ଏହି ନିୟମ ଉଲ୍ଲଙ୍ଘନ କରନ୍ତି ତେବେ ଏମସିଜି ଗୁରୁଗ୍ରାମର ଅଧିବାସୀଙ୍କ ଉପରେ ୫ ହଜାର ଟଙ୍କା ଜରିମାନା ଲଗାଇବ ।
ନଗର ନିଗମ ସୂଚନା ଅନୁସାରେ ଗୁରୁଗ୍ରାମର କିଛି ଅଂଶରେ ସପ୍ଲାଇ ଲାଇନରେ ସିଧା ରୂପେ ମୋଟର ଏବଂ ପମ୍ପକୁ ବଡ ପରିମାଣରେ ଲଗାଯିବା ଫଳରେ ମଧ୍ୟ ଜଳ ସଙ୍କଟ ସୃଷ୍ଟି ହୋଇଛି । ଏହି ଉଲ୍ଲଙ୍ଘନ ଯୋଗୁଁ ଅନେକ ସମୟରେ ମେନ୍ ସପ୍ଲାଇ ଲାଇନରୁ ପାଣିର ଚାପ କମ୍ ହୋଇଯାଉଛି । ଏମସିଜିର କମିଶନର ନରହରୀ ସିଂହ ବାଙ୍ଗର କହିଛନ୍ତି କି ନଗର ନିଗମ ଗୁରୁଗ୍ରାମରେ ଅନଧିକୃତ କାର୍ ସଫା କେନ୍ଦ୍ରରେ ମଧ୍ୟ କାର୍ଯ୍ୟାନୁଷ୍ଠାନ ଗ୍ରହଣ କରିବ । ଏଭଳି କେନ୍ଦ୍ରକୁ ସିଲ୍ କରିଦିଆଯିବ ଏବଂ ପାଣି କନେକ୍ସନ କାଟିଦିଆଯିବ । ନିକଟରେ ବେଙ୍ଗାଲୁରୁରେ ମଧ୍ୟ ଭୀଷଣ ଜଳ ସଙ୍କଟ ଦେଖାଯାଇଥିଲା । ରାଜ୍ୟରେ ଜଳ ବୋର୍ଡର ନିଷ୍ପତ୍ତି ଉଲ୍ଲଙ୍ଘନ କରି କାର୍ ଧୋଇବା ପାଇଁ ପିଇବା ପାଣି ବ୍ୟବହାର କଲେ ସହରର ନଗର ନିଗମ ୫ ହଜାର ଟଙ୍କା ଜରିମାନା ଲଗାଇବ ବୋଲି କହିଥିଲା ।
