ଭୁବନେଶ୍ବର: ବହୁ ଚର୍ଚ୍ଚିତ ମାନସ ସ୍ବାଇଁ ହତ୍ୟାକାଣ୍ଡ ମାମଲାର ସିବିଆଇ ତଦନ୍ତ ଦାବି କଲେ ମୃତ ମାନସଙ୍କ ମା’। ମୃତ ମାନସ ସ୍ବାଇଁଙ୍କ ମା’ କହିଛନ୍ତି ଯେ ଏହି ଘଟଣାରେ କ୍ରାଇମ ବ୍ରାଞ୍ଚ କେବଳ ଶର୍ମିଷ୍ଠା ରାଉତଙ୍କୁ ଗିରଫ କରିଛି। କିନ୍ତୁ ପୁଅ ମାନସଙ୍କୁ ହତ୍ୟା ପଛରେ ବହୁ ବଡ଼ ବଡ଼ ନେତା ଓ ମନ୍ତ୍ରୀ ଅଛନ୍ତି। ସିବିଆଇ ତଦନ୍ତ କରାଯାଇ ସେହି ନେତା ଓ ମନ୍ତ୍ରୀଙ୍କୁ ଗିରଫ କରାଯାଉ। ଯେଉଁ ମେମୋରି ଚିପ କଥା କୁହାଯାଉଛି, ତାହା ସାମ୍ନାକୁ ଆସୁ। ସେ ଚିପରେ କେଉଁ ଭିଡ଼ିଓ ଥିଲା, ଯେଉଁଥିପାଇଁ ମୋ ପୁଅକୁ ହତ୍ୟା କଲେ। ସେ ମେମୋରି ଚିପ୍ରେ କ’ଣ ଅଛି, ତାହା ପ୍ରକାଶ କରାଯାଉ ବୋଲି ମୃତ ମାନସଙ୍କ ମା’ ପ୍ରକାଶ କରିଛନ୍ତି।
ଅପରପକ୍ଷରେ ଆଜି କ୍ରାଇମ ବ୍ରାଞ୍ଚର ୫ଜଣିଆ ଟିମ କ୍ୟାମେରାମ୍ୟାନ ମାନସ ସ୍ବାଇଁଙ୍କ ଘରେ ପହଞ୍ଚିଥିଲେ । ନୟାଗଡ଼ ଜିଲା ରଣପୁର ଅଞ୍ଚଳରେ ଥିବା ମାନସଙ୍କ ଘରେ ପହଞ୍ଚି ସେମାନେ ମାନସଙ୍କ ଚପଲ ଓ ଇୟରଫୋନ ଚିହ୍ନଟ କରିବାକୁ କହିଥିଲେ। ଏହାସହିତ ମାନସଙ୍କ ଭାଇ ଓ ପରିବାର ସହ କ୍ରାଇମବ୍ରାଞ୍ଚ ଟିମ ଆଲୋଚନା କରିଥିଲେ।
କ୍ୟାମେରାମ୍ୟାନ ମାନସ ସ୍ବାଇଁ ହତ୍ୟାକାଣ୍ଡର ମୁଖ୍ୟ ଅଭିଯୁକ୍ତ ଶର୍ମିଷ୍ଠା ରାଉତ ଓ ଝୁନା ଭୋଇଙ୍କୁ ପୁଣି ଥରେ ୩ ଦିନିଆ ରିମାଣ୍ଡରେ ଆଣି ପଚରା ଉଚୁରା କରୁଛି।
