ବୌଦ୍ଧ : ଗୋଟିଏ ପଟେ ଜିଲାରେ ହୁ ହୁ ହୋଇ କରୋନା ସଂକ୍ରମିତଙ୍କ ସଂଖ୍ୟା ବଢିଚାଲିଥିବାବେଳେ ଅନ୍ୟପଟେ କୋଭିଡ ସ୍ୱାସ୍ଥ୍ୟ କେନ୍ଦ୍ରରେ ଗୋଟିଏ ପରେ ଗୋଟିଏ ଅବ୍ୟବସ୍ଥା ଖବରକୁ ନେଇ ସାଧାରଣରେ ଅସନ୍ତୋଷ ବୃଦ୍ଧି ପାଇବାରେ ଲାଗିଛି। ବୌଦ୍ଧ ସହରରେ ଯଦିଓ ସଂକ୍ରମିତଙ୍କ ସଂଖ୍ୟା ଗ୍ରାମାଞ୍ଚଳ ତୁଳନାରେ ଯଥେଷ୍ଟ କମ ରହିଛି, କିନ୍ତୁ ସଂକ୍ରମିତ ରୋଗୀମାନେ ଗୃହ ସଙ୍ଗରୋଧରେ ନରହି ବାହାରେ ହାଟ ବଜାର ବୁଲିବା ନେଇ ଜଣାପଡିବାପରେ ସାଧାରଣଲୋକ ଅଧିକ ସଂଖ୍ୟାରେ ସଂକ୍ରମିତ ହେବାର ଆଶଙ୍କା ପ୍ରକାଶ ପାଇଛି। ସବୁଠାରୁ ଉଦବେଗପୂର୍ଣ୍ଣ ଘଟଣା ହେଉଛି ସଂକ୍ରମିତ ଚିହ୍ନଟ ହେବାପରେ କୋଭିଡ ଯତ୍ନ କେନ୍ଦ୍ରରେ ଚିକିତ୍ସା ପାଇଁ ଭର୍ତ୍ତି ହୋଇଥିବା ରୋଗୀମାନେ ମଧ୍ୟ ବାହାରେ ବୁଲୁଥିବା ଜଣାପଡିଛି।
କୋଭିଡ ଯତ୍ନ କେନ୍ଦ୍ର ମଧ୍ୟରେ ଓ ଫାଟକରେ କଡା ସୁରକ୍ଷା ଓ ଚାରିପଟେ ପାଚେରୀ ଥିବା ସତ୍ୱେ ଭିତରେ ଚିକିତ୍ସାଧିନ ଜଣେ ବୃଦ୍ଧ ଆଜି ସେଠାରୁ ଖସିଆସି ବୌଦ୍ଧ ଏନଏସି ଛକନିକଟରେ ବସିଥିବା ଜଣାପଡିଥିଲା। ଏ ସଂପର୍କରେ ସୂଚନା ପାଇବାପରେ କୋଭିଡ ଯତ୍ନ କେନ୍ଦ୍ର ଦାୟିତ୍ୱରେ ଥିବା କର୍ମଚାରୀମାନେ ସେଠାରେ ପହଞ୍ଚି ତାଙ୍କୁ ଗାଡିରେ ବସାଇ ନେଇଯାଇଥିଲେ। ତେବେ କୋଭିଡ ଯତ୍ନ କେନ୍ଦ୍ରରେ ଏତେ ସୁରକ୍ଷା ଥିବା ସତ୍ୱେ ସଂକ୍ରମିତ ବୃଦ୍ଧ ଜଣକୁ ସେଠାରୁ କିପରି ଖସି ଆସିଲେ ତାହାକୁ ନେଇ ଏବେ ଆଲୋଚନା ଜୋର ଧରିଛି।
