୩ ଯୁବତୀଙ୍କୁ କାର୍ ଧକ୍କାଦେବା ଘଟଣା: ମୃତକଙ୍କ ପରିବାରକୁ କ୍ଷତିପୂରଣ ଦାବିରେ ୧୨ ଘଣ୍ଟିଆ ନୁନହାଡ ବନ୍ଦ

ବଲାଙ୍ଗୀର: ବଲାଙ୍ଗୀର ଜିଲ୍ଲା ବେଲପାହାଡ ଥାନା ନୁନହାଡ ଗାଁର ହିଟ୍ ଆଣ୍ଡ ରନ୍ ଘଟଣାର ତାତି ଥମିବାର ନାଁ ନେଉନି। ଘଟଣାକୁ ନେଇ ଆଜି ୧୨ ଘଣ୍ଟିଆ ନୁନହାଡ ବନ୍ଦ ପାଳନ କରୁଛନ୍ତି ଗ୍ରାମବାସୀ। ଅଭିଯୁକ୍ତ ବିରୋଧରେ କଡା କାର୍ଯ୍ୟାନୁଷ୍ଠାନ ସହ ମୃତ ଯୁବତୀଙ୍କ ପରିବାରକୁ କ୍ଷତିପୂରଣ ପାଇଁ ଆନ୍ଦୋଳନକାରୀମାନେ ଦାବି କରିଛନ୍ତି। ସୂଚନା ଅନୁସାରେ ମଙ୍ଗଳବାର ଢାବା ମାଲିକ ସୁଶୀଲ କୁମାର ସାହୁ ତାଙ୍କ କାରରେ ଦ୍ରୁତ ଗତିରେ ଆସି ନିଜ ଘର ଆଗରେ ଛିଡା ହୋଇଥିବା ତିନି ଜଣ ଯୁବତୀଙ୍କୁ ଧକ୍କା ଦେଇ ଫେରାର୍ ହୋଇଥିବା ଅଭିଯୋଗ ହୋଇଥିଲା। ଏଥିରେ ଜଣେ ଯୁବତୀଙ୍କର ପାଟଣାଗଡ ହସ୍ପିଟାଲରେ ମୃତ୍ୟୁ ହୋଇଥିବାବେଳେ ଅନ୍ୟ ଦୁଇ ଜଣ ଗୁରୁତର ଆହତ ହୋଇଛନ୍ତି। ସେମାନଙ୍କୁ ବଲାଙ୍ଗୀର ଭୀମଭୋଈ ମେଡିକାଲ କଲେଜ ହସ୍ପିଟାଲରେ ଭର୍ତ୍ତି କରାଯାଇଛି। ସେପଟେ ଅଭିଯୁକ୍ତ ସୁଶୀଲ କୁମାର ସାହୁଙ୍କୁ ପୁଲିସ୍ ଗିରଫ କରିଥିବା ଜଣାପଡିଛି। ଦୁର୍ଘଟଣା ପରେ ମଙ୍ଗଳବାର ବିଳମ୍ବିତ ରାତି ପର୍ଯ୍ୟନ୍ତ ଉତ୍ତ୍ୟକ୍ତ ଲୋକମାନେ ରାସ୍ତାରୋକ କରିଥିଲେ।