ଆରବ ସାଗରରେ ଓଲଟିଲା ମହାରାଷ୍ଟ୍ର ମୁଖ୍ୟ ଶାସନ ସଚିବଙ୍କୁ ନେଇ ଯାଉଥିବା ଡଙ୍ଗା, ଜଣେ ମୃତ

ମୁମ୍ବଇ : ମହାରାଷ୍ଟ୍ର ମୁଖ୍ୟ ଶାସନ ସଚିବଙ୍କୁ ନେଇ ଯାଉଥିବା ଏକ ଡଙ୍ଗା ମୁମ୍ବଇ ନିକଟସ୍ଥ ଆରବ ସାଗରରେ ଓଲଟି ପଡ଼ିବା ଫଳରେ ଜଣଙ୍କ ମୃତ୍ୟୁ ଘଟିଛି। ସୂଚନା ଅନୁଯାୟୀ ନରିମନ ପଏଣ୍ଟଠାରୁ ୨.୬ କିଲୋମିଟର ଦୂରରେ ଆରବ ସାଗର ମଧ୍ୟରେ ଡଙ୍ଗାଟି ଓଲଟି ପଡ଼ିଥିଲା। ଡଙ୍ଗାଟି ଶ୍ରିମକମାନଙ୍କୁ ନେଇ ଛତ୍ରପତି ଶିବାଜୀ ମହାରାଜ ମେମୋରିଆଲ ଅଭିମୁଖେ ଯାଉଥିଲା। ଭାରତୀୟ ତଟରକ୍ଷୀ ବାହିନୀ ଦ୍ୱାରା ଉଦ୍ଧାର କାର୍ଯ୍ୟ ଆରମ୍ଭ ହୋଇଛି। କେତେକ ଲୋକଙ୍କୁ ସୁରକ୍ଷିତ ଉଦ୍ଧାର କରାଯାଇଥିବା ସୂଚନା ମିଳିଛି। ମୃତ ବ୍ୟକ୍ତିଙ୍କ ନାମ ସିଦ୍ଧାର୍ଥ ପୱାର ଏବଂ ତାଙ୍କ ଘର ସାନ୍ତାକ୍ରୁଜରେ ବୋଲି ଜାଣିବାକୁ ମିଳିଛି। ଏକ ବତୀଘର ଚଟାଣରେ ପିଟି ହୋଇ ଡଙ୍ଗାଟି ଓଲଟି ପଡ଼ିଥିଲା ବୋଲି କୁହାଯାଉଛି। ଶିବାଜୀ ମହାରାଜ ମେମୋରିଆଲରେ ଚାଲିଥିବା ନିର୍ମାଣ କାର୍ଯ୍ୟ ପାଇଁ ପ୍ରଶାସନର କେତେଜଣ ବରିଷ୍ଠ ଅଧିକାରୀ, ରାଜ୍ୟର ମୁଖ୍ୟ ଶାସନ ସଚିବ ଶ୍ରମିକଙ୍କୁ ନେଇ ଡଙ୍ଗାରେ ଯାଉଥିଲା ବେଳେ ଏହି ଦୁର୍ଘଟଣା ଘଟିଥିଲା ।