ପୁଲିସ ବାବୁଙ୍କ ଘାରିଛି ‘କଳା କାଚ’ ଡ଼ର । ଏହି ଡ଼ର ଏତେ ପ୍ରବଳ ଯେ ସୁପ୍ରିମକୋର୍ଟ ଓ ସରକାରଙ୍କ ନିର୍ଦେଶକୁ ବି କାର୍ଯ୍ୟକାରୀ କରିବାକୁ ବାବୁମାନେ ଡ଼ରୁଛନ୍ତି । କଳା କାଚ ଲାଗିଥିବା ବଡ଼ବଡ଼ ଗାଡ଼ି ଚଢ଼ୁଥିବା ଲୋକମାନେ ଖାଲି ପାୱାରଫୁଲ ନୁହନ୍ତି, ତାଙ୍କର ପହୁଞ୍ଚ ବି ଢ଼େର ଉପରେ । କାହାର ପୁଲିସ ‘ସାହେବ’ଙ୍କ ସହ ସମ୍ପର୍କ ତ କିଏ ପୁଣି ବଡ଼ବଡ଼ ବାବୁମାନଙ୍କ ବାବୁଆଣୀମାନଙ୍କ ନିକଟରେ ପହଞ୍ଚାଉଛନ୍ତି ଭଳିକି ଭଳି ଉପହାର । ଏପରି ଲୋକଙ୍କ ଗାଡ଼ିରୁ କଳା କାଚ କାଢ଼ି ବିପଦ ଡ଼ାକିବାକୁ କୁଆଡ଼େ ସାନ ପୁଲିସ ବାବୁ ଭୟ କରୁଛନ୍ତି ।
ଅଭିଯୋଗ ଅନୁସାରେ ଅନେକ କ୍ଷମତାଶାଳୀ ବ୍ୟକ୍ତି ନିଜ କାରରେ କଳା ଫିଲ୍ମ ଲଗାଇ ଯାତାୟତ କରୁଥିବାଯୋଗୁଁ ସେମାନଙ୍କୁ ଧରିବାକୁ ପୁଲିସ ବା ପରିବହନ ବିଭାଗର ଅଧିକାରୀମାନେ ସାହସ କରିପାରୁ ନାହାନ୍ତି । ଏପରିକି କିଛି ରାଜନୈତିକ ଦଳର ନେତାମାନଙ୍କ ବ୍ୟକ୍ତିଗତ ଗାଡ଼ିରେ ମଧ୍ୟ କଳା କାଚ ଲାଗିଛି । ତେଣୁ ସେମାନଙ୍କୁ ରାସ୍ତାରେ ଅଟକାଇ କଳା କାଚ ବ୍ୟବହାର କରୁଥିବା ଯୋଗୁଁ ଜୋରିମାନା କରିବା କିମ୍ବା ଗାଡ଼ି କାଚରୁ କଳା ଫିଲ୍ମ ହଟାଇବା ସହଜ ହେଉ ନଥିବା କୁହାଯାଉଛି ।
ବଡ଼ବଡ଼ କମ୍ପାନୀର ଦାମୀ ଗାଡ଼ି ଝରକାରେ କଳା ସ୍କ୍ରିନ କମ୍ପାନୀ ପ୍ରଦାନ କରୁଛି । ଆବଶ୍ୟକସ୍ଥଳେ ଏହାକୁ କଢ଼ାଯିବାର ବ୍ୟବସ୍ଥା ହୋଇଛି । ମାତ୍ର କିଛି ଗାଡ଼ି ମାଲିକ କାର ୱିଣ୍ଡୋରେ କଳା ଫିଲ୍ମ ଲଗାଉଥିବା ଦେଖାଯାଉଛି । ଯାହା ଫଳରେ ଗାଡ଼ିର ଆଭ୍ୟନ୍ତର ଦୃଶ୍ୟମାନ ହେଉନାହିଁ । ଏହିପରି ଗାଡ଼ି ବ୍ୟବହାର କରି ଅପରାଧୀମାନେ ଅପରାଧ ଘଟାଉଛନ୍ତି, ଦେହ ବ୍ୟବସାୟ ନିମନ୍ତେ ଯୁବତୀ ଚାଲାଣ ବେଳେ ମଧ୍ୟ ଏହିପରି ଗାଡ଼ି ବ୍ୟବହାର ହେଉଥିବା ଅଭିଯୋଗ ହେଉଥିବା ବିଭିନ୍ନ ସମୟରେ ଅଭିଯୋଗ ହେଉଛି ।
କଳା ଫିଲ୍ମ ବା କଳା ସ୍କ୍ରିନ ଲାଗୁଥିବା ଗାଡ଼ିଗୁଡ଼ିକ ଅଧିକାଂଶ ସମୟରେ ଅପରାଧିକ କାର୍ଯ୍ୟକଳାପରେ ବ୍ୟବହାର ହେଉଥିବାରୁ ସୁପ୍ରିମକୋର୍ଟ ଏହାକୁ କାଢ଼ିବାକୁ ନିର୍ଦେଶ ଦେଇଛନ୍ତି । ମାତ୍ର ଏହି ନିର୍ଦେଶକୁ ନାଁ ମାନୁଛି ପୁଲିସ ନା ମାନୁଛି ପରିବହନ ବିଭାଗ । କିଛିଦିନ ତଳେ ‘ସମାଜ’ରେ ଏ ସଂକ୍ରାନ୍ତ ଖବର ପ୍ରକାଶ ପାଇବା ପରେ ପୁଲିସ ଗାଡ଼ିରୁ କଳା କାଚ ବାହାର କରିବା ଅଭିଯାନ ଆରମ୍ଭ କରିଥିଲା ପୁଲିସ । ମାତ୍ର ଦିନ କେଇଟା ପରେ ତାହା ପୁଣି ବନ୍ଦ ହୋଇଗଲା ।
ଏ ସମ୍ପର୍କରେ ବିଭାଗୀୟ ମନ୍ତ୍ରୀ ପଦ୍ମନାଭ ବେହେରା କହିଛନ୍ତି ଯେ କାରରେ କଳା କାଚ ଲଗାଇବା ଉପରେ ସୁପ୍ରିମକୋର୍ଟ କଟକଣା ଜାରି କରିଛନ୍ତି । କେବଳ ଅତି ବିଶିଷ୍ଟ ବ୍ୟକ୍ତିଙ୍କ ବ୍ୟତୀତ ଅନ୍ୟ କାହାରି କାରରେ କଳା କାଚ ଲାଗି ପାରିବ ନାହିଁ । ତେଣୁ ଏ ଦିଗରେ କାର୍ଯ୍ୟାନୁଷ୍ଠାନ ଗ୍ରହଣ କରିବା ନିମନ୍ତେ ସରକାରୀସ୍ତରରେ ନିର୍ଦେଶ ଦିଆଯାଇଛି । ତେବେ ନିର୍ଦିଷ୍ଟ ଭାବରେ ଏଯାଏ କେତେ ଗାଡ଼ିରୁ କଳା କାଚ ବା କଳା ଫିଲ୍ମ ହଟାଯାଇଛି ସେ ସମ୍ପର୍କରେ ବିସ୍ତୃତ ରିପୋର୍ଟ ମଗାଯାଇଛି । ଖୁବ୍ ଶୀଘ୍ର ଏ ଦିଗରେ ଅନୁଧ୍ୟାନ କରାଯାଇ ପଦକ୍ଷେପ ନିଆଯିବ ବୋଲି ମନ୍ତ୍ରୀ ଶ୍ରୀ ବେହେରା କହିଛନ୍ତି ।
Comments are closed.