ମୁମ୍ବଇ: ବଲିଉଡ୍ ଅଭିନେତା ସଲମାନ ଖାନ୍ଙ୍କୁ ସାନି ହତ୍ୟା ଧମକ ମିଳିଥିବା ଜଣାପଡିଛି। ମୁମ୍ବଇ ଟ୍ରାଫିକ ପୁଲିସକୁ ମିଳିଥିବା ଏକ ହ୍ବାଟସଆପ୍ ବାର୍ତ୍ତାରେ କୁହାଯାଇଛି ଯେ ଯଦି ସଲମାନ ଗ୍ୟାଙ୍ଗଷ୍ଟର ଲରେନ୍ସ ବିଷ୍ଣୋଇଙ୍କ ସହ ଶତ୍ରୁତା ଏଡାଇବାକୁ ଚାହୁଁଥାନ୍ତି, ତେବେ ତୁରନ୍ତ ବଟି ଆକାରରେ ୫ କୋଟି ଟଙ୍କା ଦିଅନ୍ତୁ। ଯଦି ଏଥିରେ ସଲମାନ ରାଜି ନ ହୁଅନ୍ତି, ତେବେ ମହାରାଷ୍ଟ୍ରର ପୂର୍ବତନ ମନ୍ତ୍ରୀ ବାବା ସିଦ୍ଦିକିଙ୍କୁ ଯେପରି ହତ୍ୟା କରାଯାଇଛି, ଏ ତୁଳନାରେ ସଲମାନ ଅଧିକ ଭୟଙ୍କର ପରିଣାମ ଭୋଗିବେ ବୋଲି ବାର୍ତ୍ତାରେ ଧମକ ଦିଆଯାଇଛି। ଏହି ଧମକକୁ ସଲମାନ କଦାପି ହାଲୁକା ଭାବେ ଗ୍ରହଣ ନ କରିବାକୁ ପରାମର୍ଶ ଦିଆଯାଇଛି। ସଲମାନ ଯଦି ଜୀବିତ ରହିବାକୁ ଏବଂ ଲରେନ୍ସ ବିଷ୍ଣୋଇ ସହ ଶତ୍ରୁତା ଏଡାଇବାକୁ ଚାହୁଁଥାନ୍ତି, ତେବେ ତାଙ୍କୁ ନିଶ୍ଚିତ ଭାବେ ୫ କୋଟି ଟଙ୍କା ଦେବାକୁ ପଡିବ ବୋଲି ଧମକ ଦିଆଯାଇଛି। ଧମକ ମିଳିବା ପରେ ମୁମ୍ବଇ ପୁଲିୁସ ପକ୍ଷରୁ ସଲମାନଙ୍କ ବାନ୍ଦ୍ରାସ୍ଥିତ ବାସଭବନରେ ସୁରକ୍ଷା ବ୍ୟବସ୍ଥାକୁ ଅଧିକ କଡାକଡି କରାଯାଇଛି। ଏଥିସହିତ ହତ୍ୟା ଧମକ ଦେଇଥିବା ବ୍ୟକ୍ତିକୁ ଚିହ୍ନଟ କରିବାକୁ ମଧ୍ୟ ପୁଲିସ ପକ୍ଷରୁ ଉଦ୍ୟମ ଆରମ୍ଭ ହୋଇଛି।
ସୂଚନାଯୋଗ୍ୟ ସଲମାନଙ୍କୁ ବିଷ୍ଣୋଇ ଗ୍ୟାଙ୍ଗ ପକ୍ଷରୁ ଏକାଧିକ ଥର ହତ୍ୟା ଧମକ ମିଳିସାରିଛି। ନଭି ମୁମ୍ବଇ ପୁଲିସ ଗତକାଲି ହରିୟାଣାର ପାନିପଥ୍ରୁ ଲରେନ୍ସ ବିଷ୍ଣୋଇର ଘନିଷ୍ଠ ସହଯୋଗୀ ସୁଖା ଓରଫ ସୁଖବୀର ବଲବୀର ସିଂହକୁ ଗିରଫ କରିଛି। ସଲମାନଙ୍କୁ ହତ୍ୟା କରିବା ଦାୟିତ୍ବ ସୁଖା ଉପରେ ନ୍ୟସ୍ତ କରାଯାଇଥିବା ପୁଲିସ ଜାଣିବାକୁ ପାଇଛି। ସଲମାନଙ୍କୁ ହତ୍ୟା କରିବାକୁ ୨୫ ଲକ୍ଷ ଟଙ୍କାର ସୁପାରି ଦିଆଯାଇଥିବାବେଳେ ଏକେ-୪୭, ଏମ-୧୬ ପିସ୍ତଲ ଭଳି ଅତ୍ୟାଧୁନିକ ଅସ୍ତ୍ରଶସ୍ତ୍ର ପାକିସ୍ତାନରୁ ଅଣାଯାଇଥିବା କୁହାଯାଇଛି। ସଲମାନଙ୍କୁ ହତ୍ୟା ଉଦ୍ୟମ କରିଥିବା ଅଭିଯୋଗରେ ମୁମ୍ବଇ ପୁଲିସ ଇତିମଧ୍ୟରେ ବିଷ୍ଣୋଇ ଗ୍ୟାଙ୍ଗର ୧୮ ଜଣ ସଦସ୍ୟଙ୍କ ବିରୋଧରେ ଏତଲା ଦାଏର କରାଯାଇଛି।
Comments are closed.