ଭବାନୀପାଟଣା: ସ୍ଥାନୀୟ ଏକ ଗୃହ ନିର୍ମାଣ କାର୍ଯ୍ୟରେ ନିୟୋଜିତ ୩ ଜଣ ଶ୍ରମିକ ବିଦ୍ୟୁତ୍ ତାର ସଂସ୍ପର୍ଶରେ ଆସି ଗୁରୁତର ଭାବେ ଆହତ ହୋଇଛନ୍ତି। ସେମାନଙ୍କ ମଧ୍ୟରୁ ଦୁଇଜଣଙ୍କୁ ବୁର୍ଲା ଡାକ୍ତରଖାନାକୁ ସ୍ଥାନାନ୍ତର କରାଯାଇଥିବା ବେଳେ ଜଣେ ଜିଲା ମୁଖ୍ୟ ଡାକ୍ତରଖାନାରେ ଭର୍ତ୍ତି ହୋଇଛନ୍ତି।
ସୂଚନା ଅନୁଯାୟୀ, ସ୍ଥାନୀୟ ପରମାନନ୍ଦପୁରଠାରେ ଜଣେ ଡାକ୍ତରଙ୍କ କୋଠା ନିର୍ମାଣ କାମ ଚାଲିଥିବାବେଳେ ବିଦ୍ୟୁତ ତାର ଲାଗି ୩ ଜଣ ଶ୍ରମିକ ଗୁରୁତର ଆହତ ହୋଇଛନ୍ତି। ସେମାନେ ଗଣନାଥପୁର ଗାଁର ନରେନ୍ଦ୍ର ବାଗ(୨୬), ଭେଜିଗୁଡ଼ା ଗାଁର ସଚିନ ଶବର(୧୮) ଏବଂ କୁଜୁଗୁଡ଼ାର ଅଲେଖ ଶବର(୧୭) ବୋଲି ଜଣାପଡିଛି। ସେମାନଙ୍କୁ ଏସଆରଏମ ମେଡିକାଲ୍ କଲେଜ ଅନ୍ତର୍ଗତ ଜିଲା ମୁଖ୍ୟ ଡାକ୍ତରଖାନାରେ ଭର୍ତ୍ତି କରାଯାଇଥିଲା। ତେବେ ପ୍ରାଥମିକ ଚିକିତ୍ସା ପରେ ନରେନ୍ଦ୍ର ଏବଂ ସଚିନଙ୍କୁ ବୁର୍ଲା ମେଡିକାଲ୍ କଲେଜକୁ ସ୍ଥାନାନ୍ତର କରାଯାଇଥିବା ଜଣାପଡ଼ିଛି। ଉଭୟଙ୍କ ଶରୀରର ବହୁ ଅଂଶ ପୋଡ଼ିଯାଇଥିବା ଡାକ୍ତରଖାନା ସୂତ୍ରରୁ ପ୍ରକାଶ।
