ଭୁବନେଶ୍ୱର : ଆଜି ସର୍ବଭାରତୀୟ ବ୍ୟବସାୟୀ ସଂଘ ପକ୍ଷରୁ ୧୨ ଘଣ୍ଟିଆ ଭାରତ ବନ୍ଦ ପାଳନ କରାଯାଉଛି। ଏହାର ପ୍ରଭାବରେ ରାଜ୍ୟରେ ଅଧିକାଂଶ ସ୍ଥାନରେ ବ୍ୟବସାୟୀଙ୍କ ପ୍ରତିଷ୍ଠାନ ଓ ଦୋକାନ ବଜାର ବନ୍ଦ ରହିଛି। ଜିଏସଟି ସରଳୀକରଣ ଓ ଇ-କମର୍ସ ବ୍ୟବସାୟୀଙ୍କ ବିସ୍ତାରବାଦୀ ନୀତି ନିୟନ୍ତ୍ରଣ ପାଇଁ ଦାବୀ କରି ଏହି ବନ୍ଦ ଡାକରା ପାଳନ କରାଯାଉଛି। ବନ୍ଦ ପାଳନକୁ ଓଡିଶା ବ୍ୟବସାୟୀ ମହାସଙ୍ଘ ମଧ୍ୟ ସମର୍ଥନ କରିଛନ୍ତି। ତେବେ ଅନ୍ୟ ସମସ୍ତ ସରକାରୀ ଓ ବେସରକାରୀ କାର୍ଯ୍ୟାଳୟ ଖୋଲା ରହିଥିବାରୁ ଯାନବାହନ କିଛି ପରିମାଣରେ ଚାଲୁ ରହିଥିବା ଦେଖାଯାଉଛି। ଅତ୍ୟାବଶ୍ୟକ ସେବା ବ୍ୟତୀତ ଅନ୍ୟ ବ୍ୟବସାୟୀମାନେ ଦୋକାନ ବଜାର ବନ୍ଦ ରଖି ସମର୍ଥନ କରିଛନ୍ତି। ମେଡିକାଲ, ଔଷଧ ଦୋକାନ, ଖିର ଆଦି ଦୋକାନ, ପେଟ୍ରୋଲ ପମ୍ପ ଖୋଲା ରହିଛି।
ରାଜ୍ୟର ବିଭିନ୍ନ ସ୍ଥାନ କଟକ, ଭୁବନେଶ୍ୱର, ରାଉରକେଲା, ବାଲେଶ୍ୱର, ଭଦ୍ରକ, ସମ୍ବଲପୁର ଆଦି ସ୍ଥାନରେ ଭାରତ ବନ୍ଦର ପ୍ରଭାବ ଦେଖାଯାଇଛି।
ସେହିପରି ରାଜଧାନୀ ଭୁବନେଶ୍ୱରର ବାପୁଜୀ ନଗର , ମାଷ୍ଟରକ୍ୟାଣ୍ଟିନ ଛକ, ୧ ନମ୍ବର ଓ ୪ନମ୍ବର ମାର୍କେଟରେ ମଧ୍ୟ ଦୋକାନ ବଜାର ବନ୍ଦ ରହିଛି। କିଛି ସ୍ଥାନ ଜନଶୂନ୍ୟ ଥିବା ବେଳେ ଅନ୍ୟ କିଛି ଅଞ୍ଚଳରେ ଗାଡିମଟର ଚଳାଚଳ କରୁଛି। ବନ୍ଦ ପାଳନକୁ ଦୃଷ୍ଟିରେ ରଖି ପୁଲିସ ଫୋର୍ସ ମୁତୟନ କରାଯାଇଛି।
Comments are closed.