ବ୍ରହ୍ମପୁର: ଲାଞ୍ଜିପଲ୍ଲୀ ବାଇପାସ ନିକଟ ଜାତୀୟ ରାଜପଥ-୧୬ ଠାରେ ଆଜି ସନ୍ଧ୍ୟା ୯ ଟା ବେଳେ ଆନ୍ଧ୍ରପ୍ରଦେଶ ପଟୁ ଆସୁଥିବା ଏକ ଟ୍ରକ ଗୋଟିଏ ବାଇକକୁ ପଛପଟୁ ଧକ୍କା ଦେବାରୁ ସ୍ବାମୀ-ସ୍ତ୍ରୀଙ୍କ ମୃତ୍ୟୁ ହୋଇଯାଇଛି। ମୃତକମାନେ ହେଲେ କନିଷି ଅଞ୍ଚଳର ଦୁର୍ଗାପ୍ରସାଦ ଶତପଥୀ(୩୫) ତାଙ୍କ ସ୍ତ୍ରୀ ଚିନ୍ମୟରାଣୀ ଶତପଥୀ(୨୩)। ଟ୍ରାଫିକ ଥାନା ପୁଲିସ ଘଟଣାସ୍ଥଳରେ ପହଞ୍ଚି ଦୁର୍ଗାପ୍ରସାଦଙ୍କୁ ଉଦ୍ଧାର କରି ଏମକେସିଜି ମେଡିକାଲରେ ଭର୍ତ୍ତି କରିଥିଲା। ଦୁର୍ଗାପ୍ରସାଦ ଜଣେ ଶିକ୍ଷକ ବୋଲି ଶୁଣିବାକୁ ମିଳୁଛି। ତାଙ୍କ ଘର ପୋଲସରାର ହୋଇଥିବା ବେଳେ ସେ କନିଷି ଅଞ୍ଚଳରେ ଘର ଭଡା ନେଇ ରହୁଥିଲେ। ପୁଲିସ ଦୁର୍ଘଟଣା ଘଟାଇଥିବା ଟ୍ରକ ସମେତ ଦୁର୍ଘଟଣାଗସ୍ତ ବାଇକକୁ ଜବତ କରିଛି ା ଟ୍ରକ ଚାଳକଙ୍କୁ ଅଟକ ରଖି ପଚରାଉଚରା କରାଯାଉଛି।
ସୂଚନା ପ୍ରକାରେ ଆଜି ରାତି ୯ଟା ବେଳେ ଦୁର୍ଗାପ୍ରସାଦ ଓ ଚିନ୍ମୟୀ ଏକ ବାଇକରେ ବ୍ରହ୍ମପୁର ସହରକୁ କୌଣସି କାମରେ ଆସୁଥିଲେ। ଲାଞ୍ଜିପଲ୍ଲୀ ବାଇପାସ ଛକ ନିକଟରେ ଥିବା ଏକ ଲଜ୍ ସମ୍ମୁଖ ରାସ୍ତାରେ ଆନ୍ଧ୍ରପ୍ରଦେଶ ପଟୁ ଆସୁଥିବା ଏକ ଟ୍ରକ ଉକ୍ତ ବାଇକକୁ ପଛପଟୁ ଧକ୍କା ଦେଇଥିଲା। ଫଳରେ ବାଇକ ଚଳାଉଥିବା ଦୁର୍ଗାପ୍ରସାଦ ଓ ପଛରେ ବସିଥିବା ଚିନ୍ମୟରାଣୀ ରାସ୍ତାରେ କଚାଡି ହୋଇ ପଡିଥିଲେ। ଚିନ୍ମୟୀରାଣୀଙ୍କ ଘଟଣାସ୍ଥଳରେ ମୃତ୍ୟୁ ହୋଇଯାଇଥିବା ବେଳେ ଦୁର୍ଗପ୍ରସାଦଙ୍କ ଡାକ୍ତରଖାନାରେ ମୃତ୍ୟୁ ହୋଇଥିବା ସୂଚନା ମିଳିଛି। ତେବେ ଏହି ଦୁର୍ଘଟଣା ପରେ ଲାଞ୍ଜିପଲ୍ଲୀ ବାଇପାସ ଠାରେ ତୁରନ୍ତ ଓଭରବ୍ରିଜ ନିର୍ମାଣ ଦାବିରେ ସେଠାରେ ଉତ୍ତେଜନା ପ୍ରକାଶ ପାଇଛି।
