କଲ୍ୟାଣସିଂହପୁର: ରାୟଗଡା ଜିଲ୍ଲା କଲ୍ୟାଣସିଂହପୁର ବ୍ଲକ ମାଝୀଗୁଡା ପଞ୍ଚାୟତ କାର୍ଯ୍ୟାଳୟ ବାରଣ୍ଡାରେ ଗୁରୁବାର ଜଣେ ଭିକ୍ଷୁକଙ୍କ ମୃତ୍ୟୁ ଘଟିଥିବା ସୂଚନା ମିଳିଛି । ଉକ୍ତ ବ୍ଲକରେ ଭିକ୍ଷୁକ ଜଣକ ହାତରେ ତ୍ରିଶୂଳ ଧରି ଗାଁ ଗାଁ ବୁଲି ଭିକ୍ଷା ବୃତ୍ତି କରି ପେଟ ପୋଷିବା ସହ ମିଳିଥିବା କିଛି ଟଙ୍କାରେ ଚକୋଲେଟ, ବିସ୍କୁଟ କିଣି ଛୋଟ ଛୋଟ ପିଲାଙ୍କୁ ଦେଇ ଖୁସି ହେଉଥିଲେ । ଗତ କାଲି ଉକ୍ତ ଭିକ୍ଷୁକଜଣକ ଶୋଇଥିବା ଅବସ୍ଥାରେ ଛଟପଟ ହେଉଥିବା ନିକଟସ୍ଥ ଦୋକାନୀ ଦେଖି ସରପଞ୍ଚ ଶାନ୍ତି କଣ୍ଡାଗରୀଙ୍କୁ ଜଣାଇଥିଲେ । ସେହି ସମୟରେ ଦୋକାନୀ ଭିକ୍ଷୁକଙ୍କ ଛଟପଟ ଦେଖିନପାରି ସ୍ୱାସ୍ଥ୍ୟକେନ୍ଦ୍ର ଓ ପୁଲିସକୁ ଯୋଗାଯୋଗ କରିଥିଲେ । ଏହାପରେ ଭିକ୍ଷୁକଙ୍କୁ କଲ୍ୟାଣସିଂହପୁର ଗୋଷ୍ଠି ସ୍ୱାସ୍ଥ୍ୟକେନ୍ଦ୍ରକୁ ଆଣିବା ବେଳେ ବାଟରେ ତାଙ୍କର ମୃତ୍ୟୁ ଘଟିଥିଲା । ଖବର ପାଇ ଏସଆଇ ଶିବ ସାହୁ ଘଟଣା ସମ୍ପର୍କରେ ଅନୁଧ୍ୟାନ କରିବା ପରେ ମୃତଦେହ ଜବତ କରି ଅପମୃତ ମାମଲା ରୁଜୁ କରିଥିଲେ । ବ୍ୟବଚ୍ଛେଦ କରାଇ ଜିଲା ଶବ ରଖିବା ଗୃହରେ ରଖିଥିଲେ । ମୃତ ଭିକ୍ଷୁକ ଜଣକ ସୋନପୁର ଜିଲାର ରମେଶ ଦୀପ(୫୬) ବୋଲି ଏସଆଇ ଶିବ ସାହୁ ସୂଚନା ଦେଇଛନ୍ତି। ଆଜି ତାଙ୍କ ସ୍ତ୍ରୀ ଓ ପୁଅ ଆସିବା ପରେ ମୃତଦେହ ହସ୍ତାନ୍ତର କରାଯାଇଛି ବୋଲି ଏସଆଇ ସାହୁ କହିଛନ୍ତି।
Popular Categories
Previous article
Next article