ମୁମ୍ବଇ : ମୁମ୍ବଇ ଗୋରେଗାଓଁସ୍ଥିତ ପତ୍ରା ଚାଲ୍ ପୁନଃବିକାଶ ଯୋଜନାରେ ଆର୍ଥିକ ଅନିୟମିତତା କରିଥିବା ଅଭିଯୋଗକ୍ରମେ ଗିରଫ ହୋଇ ଜେଲ୍ରେ ଥିବା ଶିବସେନା ସାଂସଦ ସଞ୍ଜୟ ରାଉତଙ୍କୁ ବୁଧବାର ଏକ ସ୍ବତନ୍ତ୍ର ପିଏମଏଲଏ ଅଦାଲତ ଜାମିନ ପ୍ରଦାନ କରିଛନ୍ତି। ସୂଚାନଥାଉ କି ୨୦୦୮ରେ ପତ୍ରା ଚାଲ୍ ବିକାଶ ଯୋଜନାରେ ୬୭୨ଟି ଫ୍ଲାଟ୍ ନିର୍ମାଣ କରି ଲୋକଙ୍କୁ ସୁଲଭ ମୂଲ୍ୟରେ ଯୋଗାଇ ଦେବାକୁ ମହାରାଷ୍ଟ୍ର ହାଉସିଂ ଅଥରିଟି ତରଫରୁ ଗୁରୁ ଆଶିଷ ଇନ୍ଫ୍ରାଷ୍ଟ୍ରକଚର ପ୍ରାଇଭେଟ୍ ଲିମିଟେଡ୍କୁ ଦାୟିତ୍ବ ଦିଆଯାଇଥିଲା। ତେବେ ୧୪ ବର୍ଷ ମଧ୍ୟରେ ଗୋଟିଏ ଫ୍ଲାଟ୍ ନିର୍ମାଣ ହୋଇପାରିନଥିଲା। ଫ୍ଲାଟ ନିର୍ମାଣ ନ କରି ଗୁରୁ ଆଶିଷ କମ୍ପାନୀ ଅନ୍ୟ ବିଲଡର୍ଙ୍କୁ ଜମି ବିକି ୧,୦୩୪ କୋଟି ଟଙ୍କା ଆତ୍ମସାତ କରିଥିବା ଅଭିଯୋଗ ହୋଇଥିଲା। ସଞ୍ଜୟଙ୍କ ଜାମିନ ଆବେଦନର ଶୁଣାଣି ସ୍ବତନ୍ତ୍ର ପିଏମଏଲଏ ଅଦାଲତରେ ହୋଇଥିଲା। ସଞ୍ଜୟଙ୍କ ଓକିଲ କହିଥିଲେ ରାଜନୈତିକ ତିକ୍ତତା ଓ କ୍ଷମତାର ଅପବ୍ୟବହାର କିପରି କରାଯାଏ ସଞ୍ଜୟଙ୍କ ଗିରଫଦାରୀ ତାହାର ଏକ ବଳିଷ୍ଠ ନମୁନା। ଅନ୍ୟପକ୍ଷରେ ଇଡି ତରଫରୁ ଜାମିନ ଆବେଦନକୁ ବିରୋଧ କରି ଦର୍ଶାଯାଇଥିଲା ପତ୍ରା ଚାଲ୍ ପୁନଃବିକାଶ ଯୋଜନାରେ ସଞ୍ଜୟ ପରଦା ପଛରେ ରହି ଅର୍ଥ ଆତ୍ମସାତ କରିଛନ୍ତି। ତେଣୁ ତାଙ୍କୁ ଜାମିନ ପ୍ରଦାନ କରାଯିବା ଅନୁଚିତ୍। ଉଭୟ ପକ୍ଷର ଯୁକ୍ତି ଶୁଣିବା ପରେ ଅଦାଲତ ସଞ୍ଜୟଙ୍କୁ ଜାମିନ ପ୍ରଦାନ କରିଥିଲେ।
Comments are closed.