ଆଠଗଡ : ଆଠଗଡରୁ କନ୍ଦରପୁରକୁ ସଂଯୋଗ କରୁଥିବା ରାସ୍ତାର କେନ୍ଦୁଟୋକଳି ଶବରସାହି ନିକଟରେ ରାସ୍ତାରେ ଥିବା ଏକ ପୋଲିଆ ନିକଟରେ ଏକ ଅଟୋରିକ୍ସା ଭାରସାମ୍ୟ ହରାଇ ଓଲଟି ପଡିବାରୁ ଅଟୋଚାଳକ ଓ ଅନ୍ୟ ଦୁଇଜଣ ଆହତ ହୋଇଥିବା ଜଣାପଡିଛି । ଗଣେଷ ଖଟୁଆ ନାମକ କନ୍ଦରପୁରର ଉକ୍ତ ଅଟୋର ଚାଳକ ସେହି ଗ୍ରାମର ମାଳତୀ ସାହୁ ଓ ନିରଞ୍ଜନ ନାୟକଙ୍କୁ ନେଇ ଯାଉଥିବାବେଳେ କୌଣସି କାରଣ ବଶତଃ ଭାରସାମ୍ୟ ହରାଇ ରାସ୍ତାର ପୁଲିଆରେ ପିଟି ହୋଇ ଓଲଟି ପଡିଥିଲା । ଯାତ୍ରୀ ଦ୍ୱୟ ସାମାନ୍ୟ ଆହତ ହୋଇଥିବାବେଳେ ଅଟୋ ଚାଳକଙ୍କର ଦୁଇ ଗୋଡ ୮୦ପ୍ରତିଶତ ଛିଣ୍ଡି ଯାଇଥିଲା । ରାସ୍ତା ଉପରେ ଅଧଘଣ୍ଟା କାଳ ରକ୍ତାକ୍ତ ଅବସ୍ଥାରେ ପଡି ରହିବା ପରେ ଖବର ପାଇ ସ୍ଥାନୀୟ ଲୋକ ସେମାନଙ୍କୁ ଉଦ୍ଧାର କରି ଆଠଗଡ ଡାକ୍ତରଖାନାକୁ ନେଇଥିଲେ। ତେବେ ଅଟୋଚାଳକ ଗଣେଷଙ୍କର ଅବସ୍ଥା ଗୁରୁତର ଥିବାରୁ ତାଙ୍କୁ ତୁରନ୍ତ କଟକ ବଡ ଡାକ୍ତରଖାନାକୁ ସ୍ଥାନାନ୍ତରିତ କରାଯାଇଥିବା ଜଣାପଡିଛି।
Comments are closed.