ଆଠଗଡ଼: ଆଠଗଡ଼ ଗଡ଼ଜାତର ପ୍ରସିଦ୍ଧ ପଞ୍ଚୁଦୋଳ ଯାତ୍ରା ପାଇଁ ଏକ ପ୍ରସ୍ତୁତି ବୈଠକ ଉପଜିଲ୍ଲାପାଳ ହେମନ୍ତ କୁମାର ସ୍ୱାଇଁଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଯାଇଛି। ଶ୍ରୀ ଶ୍ରୀ ରାଧାଗୋବିନ୍ଦ ଦେବଙ୍କର ପଞ୍ଚୁଦୋଳ ଯାତ୍ରା ଓ ହୋଲି ଉତ୍ସବକୁ ଚଳିତବର୍ଷ ଶୃଙ୍ଖଳିତ ଓ ବ୍ୟବସ୍ଥିତ କରିବା ପାଇଁ ଏହି ବୈଠକରେ ଆଲୋଚନା ପରେ ସହମତି ପ୍ରକାଶ ପାଇଥିଲା। ମାର୍ଚ୍ଚ ୧୩ତାରିଖ ଫଗୁଦଶମୀଠାରୁ ରାଧାଗୋବିନ୍ଦ ଜୀଉଙ୍କ ସମେତ ଅଟ୍ଟାଳି ଜଗନ୍ନାଥ ଦେବ, ରଘୁନାଥ ଜୀଉ ଓ ଅନ୍ୟ ଦିଅଁମାନେ ସୁସଜ୍ଜିତ ବିମାନରେ ବିଭିନ୍ନ ସାହିରେ ପରିକ୍ରମା କରି ଭୋଗଲାଗି ହେବେ। ୧୮ତାରିଖରେ ଦୋଳପୂର୍ଣ୍ଣିମା ଅବସରରେ ଦୁର୍ଗାବଜାର ଦୋଳମଣ୍ଡପରେ ଦୋଳ ମେଳଣ ଓ ପାଞ୍ଜି ପାଠ କରାଯିବ।
ଆସନ୍ତା ମାର୍ଚ୍ଚ ୨୩ତାରିଖରେ ଆଠଗଡ଼ର ପ୍ରସିଦ୍ଧ ପଞ୍ଚୁଦୋଳ ପର୍ବ ଯଥାରୀତି ପାଳନ କରାଯିବାକୁ ଥିବାବେଳେ କୋଭିଡ କଟକଣାକୁ ଦୃଷ୍ଟିରେ ରଖି ଶୋଭାଯାତ୍ରା ଅନୁଷ୍ଠିତ ହେବ। ୨୪ତାରିଖରେ ଆଠଗଡ଼ର ହୋଲି ଉତ୍ସବ ପାଳନ ହେବାକୁ ଥିବାବେଳେ ଏଥିରେ କେବଳ ସକାଳ ୯ଟାରୁ ୧ଟା ମଧ୍ୟରେ ହୋଲି ଖେଳ ହେବ ଏବଂ କେବଳ ଅବୀର ବ୍ୟବହାର କରିବା ପାଇଁ ବୈଠକରେ ସହମତି ପ୍ରକାଶ ପାଇଥିଲା। ଏଥିରେ କୌଣସି ରସାୟନିକ ରଙ୍ଗ ବ୍ୟବହାର ନକରିବା ପାଇଁ ଉପଜିଲ୍ଲାପାଳ ଶ୍ରୀ ସ୍ୱାଇଁ ନିବେଦନ କରିଥିଲେ।
ଏହି ବୈଠକରେ ଅନ୍ୟମାନଙ୍କ ମଧ୍ୟରେ ତହସିଲଦାର ପ୍ରିୟବ୍ରତ ଦାସ, ମଣ୍ଡଳ ଉନ୍ନୟନ ଅଧିକାରୀ ଅରୁଣ କୁମାର ଦାସ, ଉପଖଣ୍ଡ ଡାକ୍ତରଖାନା ଅଧିକ୍ଷକ ଡାକ୍ତର ବିଜୟ କୁମାର ମିଶ୍ର ପ୍ରମୁଖଙ୍କ ସମେତ ସହରର ବହୁ ମାନ୍ୟଗଣ୍ୟ ବ୍ୟକ୍ତି, ଆଇନଜୀବୀ, ବଜାର କମିଟିର କର୍ମକର୍ତ୍ତା ଓ ଗଣମାଧ୍ୟମର ପ୍ରତିନିଧି ଯୋଗଦେଇ ଆଲୋଚନାରେ ଅଂଶଗ୍ରହଣ କରିଥିଲେ। ଉପଖଣ୍ଡ ସୂଚନା ଓ ଲୋକସଂପର୍କ ଅଧିକାରୀ ଅଲେଖଚନ୍ଦ୍ର ଦାଶ ବୈଠକ ସଂଯୋଜନା କରିବା ସହିତ ଧନ୍ୟବାଦ ଅର୍ପଣ କରିଥିଲେ। ଦେବୋତ୍ତର ସହକାରୀ ଭବାନୀ ଶଙ୍କର ପଣ୍ଡା ଓ ଅନ୍ୟ କର୍ମଚାରୀ ଏଥିରେ ସହଯୋଗ କରିଥିଲେ।
Comments are closed.