ପାରା ଏସୀୟ କ୍ରୀଡ଼ା : ୨୯ଟି ସ୍ୱର୍ଣ୍ଣ ସହ ୧୧୧ଟି ପଦକ ଜିତି ପଞ୍ଚମ ସ୍ଥାନରେ ଭାରତ

ନୂଆଦିଲ୍ଲୀ : ପାରା ଏସୀୟ କ୍ରୀଡ଼ାରେ ଭାରତ ସର୍ବମୋଟ୍‌‌ ୧୧୧ଟି ପଦକ ଜିତି ଇତିହାସ ସୃଷ୍ଟି କରିଛି । ତାହାମଧ୍ୟରେ ୨୯ଟି ସ୍ୱର୍ଣ୍ଣ, ୩୧ଟି ରୌପ୍ୟ ଓ ୫୧ଟି ବ୍ରୋଞ୍ଜ ପଦକ ରହିଛି । ଭାରତ ପଦକ ତାଲିକାରେ ପଞ୍ଚମ ସ୍ଥାନରେ ରହିଛି । ଗତଥରର ଭିନ୍ନକ୍ଷମ ଏସୀୟ କ୍ରୀଡ଼ାରେ ଭାରତକୁ ୭୨ଟି ପଦକ ମିଳିଥିଲା ।
ଦିଲ୍ଲୀପ ଗାବିଦ ଟି-୪୭ ୪୦୦ ମିଟର ପ୍ରତିଯୋଗିତାରେ ସ୍ୱର୍ଣ୍ଣପଦକ ବିଜୟୀ ହୋଇଛନ୍ତି । ସଂସ୍କୃତି, ହିମାଂସି ଓ ବୃତ୍ତି ମହିଳା ଚେସ୍‌‌ ବି-୧ ବର୍ଗରେ ଆଜି ବ୍ରୋଞ୍ଜ ପଦକ ବିଜୟୀ ହୋଇଛନ୍ତି । ଆଜି ଭାରତକୁ ୧୨ଟି ପଦକ ମିଳିଛି । ତାହାମଧ୍ୟରେ ୪ଟି ସ୍ୱର୍ଣ୍ଣ, ୨ଟି ରୌପ୍ୟ ଓ ୬ଟି ବ୍ରୋଞ୍ଜ ପଦକ ରହିଛି । ପୁରୁଷ ଜାଭେଲିନ୍‌‌ ଥ୍ରୋ ଏଫ-୫୫ ପ୍ରତିଯୋଗିତାରେ ଭାରତକୁ ସ୍ୱର୍ଣ୍ଣ ଓ ବ୍ରୋଞ୍ଜ ପଦକ ମିଳିଛି । ନୀରଜ ଯାଦବ ୩୩.୬୯ ମିଟର ପର୍ଯ୍ୟନ୍ତ ଥ୍ରୋ କରି ଭିନ୍ନକ୍ଷମ ଏସୀୟ କ୍ରୀଡ଼ାରେ ନୂଆ ରେକର୍ଡ ସୃଷ୍ଟି କରିଥିବାବେଳେ ଟେକ୍‌‌ ଚାନ୍ଦ ୩୦.୩୬ ମିଟର ପର୍ଯ୍ୟନ୍ତ ଥ୍ରୋ କରିଛନ୍ତି । ଭିନ୍ନକ୍ଷମ ଚେସ୍‌‌ ପୁରୁଷ ଟିମ୍‌‌ ବି-୧ ବର୍ଗରେ ସ୍ୱର୍ଣ୍ଣପଦକ ବିଜୟୀ ହୋଇଛନ୍ତି । ପୁରୁଷ ଟିମ୍‌‌ରେ ଅଶ୍ୱିନୀ, ଦର୍ପଣ ଓ ସୌନ୍ଦର୍ଯ୍ୟ ଏହି ପଦକ ଲାଭ କରିଛନ୍ତି । ଇତିମଧ୍ୟରେ ପୁରୁଷ ଚେସ୍‌‌ ବି-୧ ବ୍ୟକ୍ତିଗତ ପ୍ରତିଯୋଗିତାରେ ଭାରତ ସ୍ୱର୍ଣ୍ଣ, ରୌପ୍ୟ ଓ ବ୍ରୋଞ୍ଜ ପଦକ ବିଜୟୀ ହୋଇଛନ୍ତି । ଦର୍ପଣ ଇରାନୀ ସ୍ୱର୍ଣ୍ଣପଦକ ବିଜୟୀ ହୋଇଥିବାବେଳେ ସୌନ୍ଦର୍ଯ୍ୟା ପ୍ରଧାନ ରୌପ୍ୟ ପଦକ ଓ ଅଶ୍ୱିନୀ ମକୱାନା ବ୍ରୋଞ୍ଜ ପଦକ ବିଜୟୀ ହୋଇଛନ୍ତି ।
ପିଆର-୩ ମିକ୍ସଡ୍‌‌ ଡବଲ୍ସ ସ୍କଲ୍‌‌ସ ରୋଇଙ୍ଗ ପ୍ରତିଯୋଗିତାରେ ଭାରତର ନାରାୟଣ ଓ ଅନୀତା ରୌପ୍ୟ ପଦକ ବିଜୟୀ ହୋଇଛନ୍ତି । ମହିଳା ୧୫୦୦ ମିଟର ଟି-୨୦ ପ୍ରତିଯୋଗିତାରେ ପୂଜା ବ୍ରୋଞ୍ଜ ପଦକ ଲାଭ କରିଛନ୍ତି ।