ନୂଆଦିଲ୍ଲୀ: ପରଲୋକ ଗମନ କରିଥିବା ପୂର୍ବତନ କେନ୍ଦ୍ର ଅର୍ଥମନ୍ତ୍ରୀ ଅରୁଣ ଜେଟଲୀଙ୍କ ଅନ୍ତିମ ଯାତ୍ରା ଆରମ୍ଭ ହୋଇଛି। ରବିବାର ଅପରାହ୍ନ ୧ଟା ପରେ ନୂଆଦିଲ୍ଲୀସ୍ଥିତ ବିଜେପି ମୁଖ୍ୟାଳୟରୁ ଜେଟଲୀଙ୍କ ପାର୍ଥିବ ଶରୀରକୁ ବିରାଟ ଶୋଭାଯାତ୍ରାରେ ଯମୁନା ନଦୀ କୂଳରେ ଥିବା ନିଗମବୋଧ ଘାଟକୁ ଅନ୍ତିମ ସଂସ୍କାର ପାଇଁ ନିଆଯାଉଛି। ସେଠାରେ ମରଶରୀର ପହଞ୍ଚିବା ପରେ ଶେଷକୃତ୍ୟ ସମ୍ପନ୍ନ କରାଯିବ।
ରବିବାର ପୂର୍ବାହ୍ନରେ କୈଳାସ କଲୋନୀସ୍ଥିତ ଜେଟଲୀଙ୍କ ବାସଭବନରେ ତାଙ୍କ ମରଶରୀରକୁ ରଖାଯାଇଥିଲା। ବହୁ ନେତା ଏବଂ ବୁଦ୍ଧିଜୀବୀ ସେଠାରେ ପହଞ୍ଚି ତାଙ୍କର ଶେଷ ଦର୍ଶନ କରିଥିଲେ। ଏହା ପରେ ପୂର୍ବାହ୍ନ ୧୧ଟାରେ ପାର୍ଥିବ ଶରୀରକୁ ଦୀନଦୟାଲ ଉପାଧ୍ୟାୟମାର୍ଗ ସ୍ଥିତ ବିଜେପି ମୁଖ୍ୟାଳୟକୁ ଅଣାଯାଇଥିଲା। ସେଠାରେ ଜନସାଧାରଣ, ବୁଦ୍ଧିଜୀବୀ ଏବଂ ନେତାମାନେ ପହଞ୍ଚି ଶେଷ ଦର୍ଶନ କରିଥିଲେ। ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ, ସ୍ବରାଷ୍ଟ୍ର ମନ୍ତ୍ରୀ ଅମିତ ଶାହ, ଯୋଗଗୁରୁ ବାବା ରାମଦେବଙ୍କ ସମେତ ଦଳୀୟ ନେତାମାନେ ଜେଟଲୀଙ୍କ ଶେଷ ଦର୍ଶନ କରିଥିଲେ। ପରେ ଅପରାହ୍ନ ୧ଟାରେ ତାଙ୍କ ମରଶରୀରକୁ ଶୋଭାଯାତ୍ରାରେ ନିଗମବୋଧ ଘାଟକୁ ନିଆଯାଇଛି।
