ଆଖଣ୍ଡଳମଣିପୀଠ: ଗ୍ରୀଷ୍ମର ଡହଡହ ଖରାକୁ, ଉତ୍କଟ ପାନୀୟଜଳ ସମସ୍ୟା

ଆରଡି: ବୈଶାଖମାସରେ  ଡହଡହ ଖରାକୁ  ଝାଞି ପବନ, ସକାଳ ୯ଟା ହେଲେ ଗ୍ରୀଷ୍ମର ପାରଦ ବଢି ମଧ୍ୟାହ୍ନ ୧୨ଟା ସୁଧା ୪୦ଡିଗ୍ରୀ ଟପୁଛି ଉପକୂଳବର୍ତ୍ତୀ ଅଞ୍ଚଳରେ । ତାହା ସାଙ୍ଗକୁ  ଉତ୍କଟ ହେବାରେ ଲାଗିଛି ପାନୀୟଜଳ ସମସ୍ୟା। ଏପରି ସମସ୍ୟା ଦେଖାଦେଇଛି ଭଦ୍ରକ ଜିଲାର ଉପକୂଳବର୍ତ୍ତୀ ଅଞ୍ଚଳ ବାବା ଆଖଣ୍ଡଳମଣିଙ୍କ ପୀଠରେ । ବିଶେଷକରି ପୀଠର  ୪ଟି ୱାର୍ଡରେ ୧ହଜାରରୁ ଉର୍ଦ୍ଧ  ଲୋକ ବସବାସ କରନ୍ତି।

ସେମାନଙ୍କର ଶୋଷ ମେଣ୍ଟାଇବା ପାଇଁ ପ୍ରତି ୱାର୍ଡରେ ରହିଛି ୧ଟି ରୁ ୨ଟି ନଳକୂପ। ୯ନଂ ୱାର୍ଡରେ ୧ଟି ନଳକୂପ ରହିଥିଲେ ମଧ୍ୟ ତାହା ଦୀର୍ଘ ୩\୪ମାସ ହେବ ଅଚଳ ହୋଇ ପଡିଛି। ସେହିପରି   ୧୦ନଂରେ  ୨ଟି ୧୧ନଂ ରେ ୧ଟି ଓ ୧୨ନଂରେ ୨ଟି ନଳକୂପ ରହିଛି। ସେଥିମଧ୍ଯରୁ ୪ଟି  ନଳକୂପ ଅଚଳ ହୋଇ ପଡିରହିଥିଲେ ମଧ୍ଯ ଗାଁର ସରପଞ୍ଚ କିମ୍ବା ବିଭାଗୀୟ ଅଧିକାରୀ ନଜର ଦେଉନଥିବା ଲୋକମାନେ ଅଭିଯୋଗ ଆଣିଛନ୍ତି।

ସେହିପରି ପୀଠରେ ୨୪ଘଣ୍ଟିଆ ପିଇବା ପାଣି ଯୋଗାଇ ଦେବା ପାଇଁ ରହିଛି ୨ଟି ମଧୁରଜଳ ପ୍ରକଳ୍ପ, ହେଲେ ଉକ୍ତ ପ୍ରକଳ୍ପରୁ ଜଳସ୍ତର କମିଯାଇଥିବାରୁ ତାହା ଲୋକମାନଙ୍କର ଶୋଷ ମେଣ୍ଟାଇବା ତ ଦୂରର କଥା ପାଣି ଟୋପାଏ ଆସୁନାହିଁ। ଫଳରେ  ପିଇବା ପାଣି ପାଇଁ ଡହଳବିକଳ ହେଉଛନ୍ତି ସ୍ଥାନୀୟ ଲୋକ ଓ ଆଗନ୍ତୁକ ଶ୍ରଦ୍ଧାଳୁଭକ୍ତ।  ଏପରି ସମସ୍ୟା ବାବଦରେ ବ୍ଲକ ପ୍ରଶାସନିକ ଅଧିକାରୀଙ୍କୁ ଜଣାଇବାରୁ ଖୁବଶିଘ୍ର ଏହାର ସମାଧାନ କରାଯିବ ବୋଲି କହିଥିଲେ।