ନୂଆଦିଲ୍ଲୀ : ଦିଲ୍ଲୀର ମୁଖ୍ୟ ଶାସନ ସଚିବଙ୍କୁ ଆକ୍ରମଣ ମାମଲାରେ ଦିଲ୍ଲୀର ଏକ କୋର୍ଟ ଅଭିଯୁକ୍ତ ଆମ ଆଦମୀ ପାର୍ଟି (ଆପ୍) ବିଧାୟକ ଅମାନତୁଲ୍ଲା ଖାନ ଏବଂ ପ୍ରକାଶ ଜରୱାଲଙ୍କ ବିଚାର ବିଭାଗୀୟ ହାଜତ ମିଆଦକୁ ୧୪ ଦିନ ପାଇଁ ବୃଦ୍ଧି କରିଛନ୍ତି । ଆପ୍ର ଏହି ଦୁଇ ବିଧାୟକ ଦିଲ୍ଲୀ ମୁଖ୍ୟ ଶାସନ ସଚିବ ଅଂଶୁ ପ୍ରକାଶଙ୍କୁ ଆକ୍ରମଣ କରିବା ମାମଲାରେ ଗିରଫ ହୋଇଛନ୍ତି ।
ଦିଲ୍ଲୀ ମେଟ୍ରୋପୋଲିଟନ୍ ମାଜିଷ୍ଟ୍ରେଟ୍ ଶେଫାଳି ବର୍ଣ୍ଣାଲା ଟଣ୍ଡନ ଗୁରୁବାର ଅଭିଯୁକ୍ତ ବିଧାୟକଙ୍କ ବିଚାର ବିଭାଗୀୟ ହାଜତ୍ ମିଆଦିକୁ ମାର୍ଚ୍ଚ ୨୨ ପର୍ଯ୍ୟନ୍ତ ବୃଦ୍ଧି କରିଛନ୍ତି । ଅଭିଯୁକ୍ତ ବିଧାୟକ ଦ୍ୱୟଙ୍କୁ ମାଣ୍ଡୋଲି ଜେଲକୁ ପଠାଇ ଦିଆଯାଇଛି । ଏହି ମାମଲାର ଆସନ୍ତା ଶୁଣାଣି ପଟିଆଲା ହାଉସ ଅଦାଲତରେ ହେବ । ଏହା ପୂର୍ବରୁ ଫେବୃଆରୀ ୨୨ରେ ଦିଲ୍ଲୀର ଏକ କୋର୍ଟ ଅମାନତୁଲ୍ଲା ଏବଂ ଜରୱାଲଙ୍କ ଜାମିନ ଆବେଦନକୁ ଖାରଜ କରି ୧୪ ଦିନିଆ ବିଚାର ବିଭାଗୀୟ ହାଜତକୁ ପଠାଇ ଦେଇଥିଲେ । ଏହାପରେ ଆଜି ସେମାନଙ୍କ ହାଜତ ମିଆଦିକୁ ବୃଦ୍ଧି କରାଯାଇଛି ।
ପ୍ରକାଶ ଯେ ମୁଖ୍ୟମନ୍ତ୍ରୀ ଅରବିନ୍ଦ କେଜରିୱାଲଙ୍କ ଘରେ ବିଳମ୍ବିତ ରାତିରେ ଅନୁଷ୍ଠିତ ବୈଠକରେ ଜରୱାଲ ଏବଂ ଅମାନତୁଲ୍ଲା ଦିଲ୍ଲୀ ମୁଖ୍ୟଶାସନ ସଚିବଙ୍କୁ ମାଡ଼ ମାରିଥିବା ଅଭିଯୋଗ ହୋଇଥିଲା । ଏହି ମାମଲାରେ ସେମାନଙ୍କୁ ଗିରଫ କରାଯାଇଛି ।
