ନୂଆଦିଲ୍ଲୀ – ପାକିସ୍ତାନକୁ ପଳାଇଥିବା ଅଞ୍ଜୁ ଏବେ ଭାରତକୁ ଆସିବା ପାଇଁ ତାଙ୍କର ସମସ୍ତ ରାସ୍ତା ବନ୍ଦ ହୋଇଯାଇଥିବା କଥା କହିଛନ୍ତି । ବିବାହିତ ଅଞ୍ଜୁ ସୋସିଆଲ୍ ମିଡିଆ ଫେସ୍ବୁକ୍ରେ ପାକିସ୍ତାନର ଜଣେ ଯୁବକଙ୍କ ସହ ବନ୍ଧୁତା କରିଥିଲେ । ଏହା ପରେ ସେ ଅଟାରୀ ସୀମା ପାର ହୋଇ ପାକିସ୍ତାନକୁ ପଳାଇଥିଲେ ।
ଅଞ୍ଜୁ ରାଜସ୍ଥାନ ଭିବାଡୀର ବାସିନ୍ଦା । ସେ ତାଙ୍କ ପତି ଅରବିନ୍ଦ ଏବଂ ଦୁଇ ଜଣ ଛୋଟ ପିଲାଙ୍କୁ ଛାଡି ପାକିସ୍ତାନ ପଳାୟନ କରିଛନ୍ତି । ସେ ତାଙ୍କ ଭଉଣୀ ତଥା ଘର ଲୋକଙ୍କୁ ଯେଉଁ କମ୍ପାନୀରେ କାମ କରୁଛନ୍ତି , ସେହି କମ୍ପାନୀ ତାଙ୍କୁ ଗୋଆ ପଠାଉଥିବା କଥା କହିଥିଲେ । ଏହାପରେ ସେ ଦିଲ୍ଲୀ ଆସି ଅମୃତସର ଯାଇଥିଲେ । ସେଠାରୁ ସେ ଅଟାରୀ ଦେଇ ପାକିସ୍ତାନ ପଳାୟନ କରିଥିଲେ ।
ଏହି ସମୟରେ ସେ ତାଙ୍କ ସ୍ୱାମୀଙ୍କ ସହ ଓ୍ୱାଟସ୍ଆପ୍ରେ ଚାଟ୍ କରୁଥିଲେ । ସେ ଲାହୋରରେ ଥିବା କଥା କହିଥିଲେ । କିଛିଦିନ ପରେ ସେ ଫେରି ଆସିବେ ବୋଲି ତାଙ୍କ ସ୍ୱାମୀଙ୍କୁ କହିଥିଲେ । ହେଲେ ସେଠାରେ ସେ ନସରୁଲ୍ଲା ନାମକ ବ୍ୟକ୍ତିଙ୍କୁ ବିବାହ କରିଥିଲେ । ସେଠାରେ ସେ ଇସଲାମ୍ ଗ୍ରହଣ କରିବା ପରେ ତାଙ୍କ ନାମ ଫତିମା ରଖାଯାଇଥିଲା । ସେଠାକାର ନାସିରୁଲ୍ଲାଙ୍କୁ ଅଦାଲତରେ ବିବାହ କରିଛନ୍ତି । ତାଙ୍କ ନିକାହ ବା ବିବାହ କଥା ପାକିସ୍ତାନ କର୍ତ୍ତୃପକ୍ଷ ପୃଷ୍ଟି କରିଛନ୍ତି ।
ଦୁଇ ବର୍ଷ ତଳେ ଅଞ୍ଜୁ ବିଦେଶରେ ଚାକିରି କରିବା ପାଇଁ ପାସପୋର୍ଟ ତିଆରି କରିଥିଲେ । ଏବେ ଏକ ସାକ୍ଷାତକାରରେ ଅଞ୍ଜୁ ତାଙ୍କର ଭାରତ ଆସିବା ପାଇଁ କୌଣସି ରାସ୍ତା ନାହିଁ ବୋଲି କହିଛନ୍ତି । ଏପରିକି ତାଙ୍କ ପରିବାର ଲୋକ କି ତାଙ୍କ ପିଲାମାନେ ମଧ୍ୟ ତାଙ୍କୁ ଗ୍ରହଣ କରିବେ ନାହିଁ ବୋଲି ସେ କହିଛନ୍ତି ।
Comments are closed.