ନୂଆଦିଲ୍ଲୀ: ପ୍ରଥମଥର ପାଇଁ ଭାରତ-ଆମେରିକା ନୌସେନାର ମାଲୱାର ସମରାଭ୍ୟାସରେ ଜାପାନ ଓ ଅଷ୍ଟ୍ରେଲିଆ ସାମିଲ ହେବେ । ଲାଦାଖରେ ଚୀନର ହିଂସ୍ର ଆଚରଣ ଓ ସୀମାରେ ଉତ୍ତେଜନା ମଧ୍ୟରେ ଏହି ଭାରତ ଓ ଆମେରିକାର ମିଳିତ ନୌସମରାଭ୍ୟାସରେ ଜାପନ ଓ ଅଷ୍ଟ୍ରେଲିଆ ଯୋଗ ଦେବାକୁ ଆଗ୍ରହ ପ୍ରକାଶ କରିବା ଚୀନ ପାଇଁ ଶିରପୀଡ଼ା ହୋଇଛି । ‘କ୍ବାଡ଼’ ଅର୍ଥାତ୍ ୪ ଦେଶ ସଦସ୍ୟ ବିଶିଷ୍ଟ ମିଳିତ ମଞ୍ଚ ପ୍ରଥମଥର ପାଇଁ ବଙ୍ଗୋପ ସାଗର ଓ ଆରବ ସାଗରରେ ସମରାଭ୍ୟାସ କରିବେ।
ତେବେ ଭାରତୀୟ ପ୍ରତିରକ୍ଷା ମନ୍ତ୍ରଣାଳୟ ପକ୍ଷରୁ ଏକ ବିବୃତିରେ ଏହି ସମରାଭ୍ୟାସ ସହ ଚୀନ ସୀମାରେ ଉତ୍ତେଜନାର କୌଣସି ସମ୍ପର୍କ ନାହିଁ ବୋଲି ଏକ ବିବୃତିରେ କୁହାଯାଇଛି । ମନ୍ତ୍ରଣାଳୟ ପକ୍ଷରୁ କୁହାଯାଇଛି ଯେ ଏଥିରେ ଅଂଶଗ୍ରହଣ କରୁଥିବା ଦେଶର ନୌସେନା ମଧ୍ୟରେ ସମନ୍ବୟକୁ ଦୃଢ଼ୀକରଣ ନିମନ୍ତେ ଏହି ପଦକ୍ଷେପ ଗ୍ରହଣ କରାଯାଇଛି । ୧୯୯୨ ମସିହାରୁ ଭାରତ ଓ ଆମେରିକା ମଧ୍ୟରେ ନୌ ସମରାଭ୍ୟାସ ମାଲୱାରରେ ଚାଲିଛି, ୨୦୧୫ରେ ଏଥିରେ ଜାପାନ ସାମିଲ ହୋଇଥିଲା ଏବଂ ଏବେ ଅଷ୍ଟ୍ରେଲିଆ ଏଥିରେ ସାମିଲ ହେବାକୁ ଆଗ୍ରହ ପ୍ରକାଶ କରିଛି ।
ଗତ କିଛି ବର୍ଷ ଧରି ଏହି ସମରାଭ୍ୟାସରେ ଭାଗ ନେବାକୁ ଅଷ୍ଟ୍ରେଲିଆ ଆଗ୍ରହ ଆସୁଥିଲା । ଅଷ୍ଟ୍ରେଲିଆର ବୈଦେଶିକ ବ୍ୟାପାର ମନ୍ତ୍ରୀ ମାରିଜ ପେନେ ତାଙ୍କ ଦେଶ ଚଳିତ ବର୍ଷ ଶେଷରେ ମାଲାବାର ଅଭ୍ୟାସରେ ଅଂଶଗ୍ରହଣ କରିବାକୁ ସ୍ବୀକାର କରିବା ସହ ଏହା ସେମାନଙ୍କ ପାଇଁ ନୌସେନା ସମନ୍ବୟର ଏକ ସୁଯୋଗ ବୋଲି କହିଛନ୍ତି । ସେହିପରି ମାଲୱାର ଭଳି ଉଚ୍ଚ-ସାମରିକ ଅଭ୍ୟାସରେ ଯୋଗ ଦେବା ଫଳରେ ଆମର ବନ୍ଧୁମାନଙ୍କ ସହ ଏକ ଭଲ ସମ୍ପର୍କ ସୃଷ୍ଟି କରିବ ଏବଂ ଅଷ୍ଟ୍ରେଲିଆ ସେନାର ସାମୁଦ୍ରିକ ଯୁଦ୍ଧ ଦକ୍ଷତାର ବିକାଶ ଘଟାଇବ ବୋଲି ଅଷ୍ଟ୍ରେଲୀୟ ପ୍ରତିରକ୍ଷା ମନ୍ତ୍ରୀ ଲିଣ୍ଡା ରେନୋଲ୍ଡସ୍ କହିଛନ୍ତି ।
