ଆଠଗଡ : ଆଠଗଡ ଥାନା ଅନ୍ତର୍ଗତ ଖୁଣ୍ଟୁକଟାଠାରେ ୬୫ନଂ ରାଜ୍ୟ ରାଜପଥ କଡରେ ଶନିବାର ମଧ୍ୟରାତ୍ରିରେ ଏକ ବୋଲେରୋ ଗାଡି ଗୋଟିଏ ଇଣ୍ଟରନେଟ ସେବା ଓ ଚା’ ଦୋକାନ ଉପରକୁ ଚଢିଯିବା ଫଳରେ ସେଠାରେ ଉପସ୍ଥିତ ଜଣେ ବ୍ୟକ୍ତିର ମୃତ୍ୟୁ ହୋଇଥିବାବେଳେ ଅନ୍ୟଜଣେ ଗୁରୁତର ଆହତ ହୋଇଥିବା ଜଣାପଡିଛି । ବିଳମ୍ବିତ ରାତ୍ରିରେ ନୟାଗଡ ଆଡୁ ଆସୁଥିବା ଏକ ମାଲ ବୋଝେଇ ଟ୍ରକର ଚାଳକ ଓ ଖଲାସି ଖୁଣ୍ଟକଟା ପଞ୍ଚାୟତ କାର୍ଯ୍ୟାଳୟ ନିକଟରେ ଥିବା ଉକ୍ତ ଚା’ ଦୋକାନରେ ଚା’ ପିଇବା ପାଇଁ ଯାଇଥିଲେ। ଏହି ସମୟରେ କଟକ ଆଡୁ ଅତି ଦ୍ରୁତଗତିରେ ଆସୁଥିବା ଏକ ବୋଲେରୋ ଭାରସାମ୍ୟ ହରାଇ ରାସ୍ତାକଡକୁ ଚାଲିଯିବା ସହ ଉକ୍ତ ଦୋକାନ ଉପରେ ଚଢି ଯାଇଥିଲା। ସେଠାରେ ଚା ପିଉଥିବା ଟ୍ରକର ଖଲାସି ଦଶପଲ୍ଲା ଅଞ୍ଚଳର ବଳରାମ ନାୟକ(୨୪)ଙ୍କ ଉପରେ ଚଢିଯିବା ସହ ତାଙ୍କୁ ପ୍ରାୟ ୮୦ମିଟର ଦୂରକୁ ଘୋଷାଡି ନେଇଥିଲା । ଏଥି ସହିତ ଚାଳକ ନୟାଗଡ ଜିଲ୍ଲା ନୂଆଗାଁ ଥାନା ଅଧିନ ଅନ୍ଧାରକଣା ଗ୍ରାମର କାଳନ୍ଦୀ ନାୟକ ମଧ୍ୟ ବୋଲେରୋ ଧକ୍କାରେ ଗୁରୁତର ହୋଇଥିଲେ। ଉଭୟଙ୍କୁ ତୁରନ୍ତ ସ୍ଥାନୀୟ ଲୋକ ଆଠଗଡ ଡାକ୍ତରଖାନାକୁ ନେଇଯାଇଥିବାବେଳେ ସେଠାରେ ଖଲାସି ବଳରାମଙ୍କୁ ଡାକ୍ତର ମୃତ ଘୋଷଣା କରିଥିବାବେଳେ ଗୁରୁତର ଆହତ ଚାଳକ କାଳନ୍ଦୀଙ୍କୁ କଟକ ସ୍ଥାନାନ୍ତରିତ କରାଯାଇଥିଲା। କଟକ ଶିଖରପୁର ଅଞ୍ଚଳର ଉକ୍ତ ବୋଲେରୋ ଗାଡି ମଧ୍ୟରେ ୧୨ଟିରୁ ଅଧିକ ପ୍ଲାଷ୍ଟିକ ଜାରକିନ ରହିଥିବାରୁ ତାହା ଭିରୁଡା ଅଞ୍ଚଳକୁ ଚୋରା ଦେଶୀମଦ ଆଣିବା ପାଇଁ ଯାଉଥିଲା ବୋଲି ପ୍ରାଥମିକ ଅନୁସନ୍ଧାନରୁ ଜଣାପଡିଛି । ବୋଲେରୋ ଧକ୍କାରେ ଇଣ୍ଟରନେଟ ଓ ଚା ଦୋକାନ ଭାଙ୍ଗିରୁଜି ଯାଇଥିବାବେଳେ ଗୋଟିଏ ସାଇକଲ ଓ ଗୋଟିଏ ବାଇକ ସଂପୂର୍ଣ୍ଣ ଭାଙ୍ଗିରୁଜି ନଷ୍ଟ ହୋଇଯାଇଛି । ଆଇଆଇସି ବାମଦେବ ସ୍ୱାଇଁଙ୍କ ନିର୍ଦ୍ଦେଶକ୍ରମେ ତଦନ୍ତକାରୀ ଅଧିକାରୀ ଉପନିରୀକ୍ଷକ ଜନ୍ମିତା ସାସମଲ ଘଟଣାସ୍ଥଳକୁ ଯାଇ ତଦନ୍ତ କରିଛନ୍ତି।
Comments are closed.