ସମାଜ ଡିଜିଟାଲ ଡେସ୍କ: ଶୀର୍ଷକଟି ପଢ଼଼ି ଟିକେ ଅଡୁଆ ଲାଗୁଥିବ। କିନ୍ତୁ ଏପରି ଘଟଣା ସାମ୍ନାକୁ ଆସିଛି ଦେଶର ରାଜଧାନୀ ନୂଆଦିଲ୍ଲ୍ୀରେ। ମୁସଲମାନଙ୍କ ପର୍ବ ଇଦ ଅବସରରେ କଂସେଇ ଖାନାରେ କଟାଯିବାକୁ ଥିବା ୧୨୪ ଛେଳିଙ୍କୁ ନୂଆ ଜୀବନ ଦେଇଛନ୍ତି ଦିଲ୍ଲୀର ଜଣେ ୨୯ ବର୍ଷୀୟ ଯୁବକ ବିବେକ ଜୈନ ଏବଂ ତାଙ୍କର କିଛି ବନ୍ଧୁ। ବିବେକଙ୍କୁ ଏହି ନିଆରା ପ୍ରୟାସକୁ ବେଶ୍ ପ୍ରଶଂସା ମିଳିଛି।
ବିବେକ ପେସାରେ ଜଣେ ଚାର୍ଟର୍ଡ ଆକାଉଣ୍ଟାଣ୍ଟ। ନିକଟରେ ମୁସଲମାନଙ୍କ ପର୍ବ ଇଦ୍ ପାଳିତ ହୋଇଯାଇଛି। ଇଦ ଅବସରରେ କଟାଯିବାକୁ ଥିବା ଛେଳିଙ୍କୁ କିଣିବାକୁ ଯୋଜନା କରିଥିଲେ ବିବେକ ଏବଂ ତାଙ୍କର ବନ୍ଧୁମାନେ। ବିବେକ ନିଜ ସାଙ୍ଗମାନଙ୍କ ସହିତ ମିଶି ପୁରୁଣା ଦିଲ୍ଲୀର ବଜାରକୁ ଯାଇଥିଲେ। ସେଠାରେ ବୁଲି ବୁଲି ୧୨୪ ଛେଳିଙ୍କୁ କିଣିଥିଲେ। ଏଥିପାଇଁ ସେମାନଙ୍କୁ ପ୍ରାୟ ୧୨ ଲକ୍ଷ ଟଙ୍କା ଦେବାକୁ ପଡ଼ିଥିଲା।
ବିବେକ ଏବଂ ତାଙ୍କ ସାଙ୍ଗମାନେ ଏତେ ସଂଖ୍ୟକ ଛେଳିକୁ କିଣି ସେମାନଙ୍କ ଜୀବନ ରକ୍ଷା କରିଥିଲେ। ବର୍ତ୍ତମାନ ସେମାନେ ଉତ୍ତରପ୍ରଦେଶର ବାଗପତ ଅଞ୍ଚଳରେ ଥିବା ଏକ ଛେଳି ଆଶ୍ରୟ କେନ୍ଦ୍ରକୁ ଏହି ଛେଳିମାନଙ୍କୁ ପଠାଇବାକୁ ଯୋଜନା କରିଛନ୍ତି।
ଗଣମାଧ୍ୟମକୁ ପ୍ରତିକ୍ରିୟା ଦେଇ ବିବେକ କହିଛନ୍ତି, ଧାର୍ମିକ ଦର୍ଶନଶାସ୍ତ୍ର ‘ନିଜେ ବଞ୍ଚ ଓ ଅନ୍ୟକୁ ବଞ୍ଚିବାକୁ ଦିଅ’ ଏବଂ ଅହିଂସା ଦ୍ୱାରା ଅନୁପ୍ରାଣିତ ହୋଇ ସେ ଏପରି କରିଛନ୍ତି। ପ୍ରଥମେ ସେ ନିଜ ସଞ୍ଚିତ ଅର୍ଥରେ ୬/୭ଟି ଛେଳି କିଣିବାକୁ ଯୋଜନା କରିଥିଲେ। କିନ୍ତୁ ତାଙ୍କ ସାଙ୍ଗମାନେ ଯେତେବେଳେ ତାଙ୍କ ଯୋଜନା ବିଷୟରେ ଜାଣିଲେ, ସେମାନେ ଏହି ମହତ କାର୍ଯ୍ୟ ପାଇଁ ଆର୍ଥିକ ସହାୟତା ଦେଇଥିଲେ। ପରେ ସମସ୍ତେ ମିଶି ଏହି ଛେଳିଙ୍କୁ କିଣିବା ସହିତ ସେମାନଙ୍କ ଥଇଥାନ ବ୍ୟବସ୍ଥା କରିଥିଲେ।
Comments are closed.