ନୂଆଦିଲ୍ଲୀ : ଆସନ୍ତା ୬ ମାସ ମଧ୍ୟରେ ଟୁ-ଜି ମାମଲାର ତଦନ୍ତ ଶେଷ କରିବାକୁ ସୁପ୍ରିମ କୋର୍ଟ ସିବିଆଇ ଓ ପ୍ରବର୍ତ୍ତନ ନିର୍ଦେଶାଳୟ (ଇଡି)କୁ ନିର୍ଦ୍ଦେଶ ଦେଇଛନ୍ତି । ସେହିପରି ଆସନ୍ତା ୨ ସପ୍ତାହ ମଧ୍ୟରେ ଟୁ-ଜି ଓ ତତ୍ ସଂପର୍କିତ ମାମଲା ଗୁଡ଼ିକର ତଦନ୍ତ ସଂପର୍କରେ ଏକ ଷ୍ଟାଟସ୍ ରିପୋର୍ଟ ଦାଖଲ ପାଇଁ ନ୍ୟାୟାଳୟ କେନ୍ଦ୍ର ସରକାରଙ୍କୁ ନିର୍ଦ୍ଦେଶ ଦେଇଛନ୍ତି । ଆସନ୍ତା ୬ ମାସ ମଧ୍ୟରେ ଟୁ-ଜି ଓ ତାହା ସହିତ ସଂପର୍କ ଥିବା ଅନ୍ୟ ସମସ୍ତ ମାମଲାର ତଦନ୍ତ ସାରିବାକୁ ସର୍ବୋଚ୍ଚ ନ୍ୟାୟାଳୟ ନିର୍ଦ୍ଦେଶ ଦେଇଛନ୍ତି ।
ଦୀର୍ଘ ବର୍ଷ ଧରି ଟୁ-ଜି ମାମଲାର ତଦନ୍ତ ଚାଲିଥିବା ନେଇ ସୁପ୍ରିମକୋର୍ଟ ଅସନ୍ତୋଷ ପ୍ରକାଶ କରିଛନ୍ତି । ଜଷ୍ଟିସ ଅରୁଣ ମିଶ୍ର ଓ ନବୀନ ସିହ୍ନାଙ୍କୁ ନେଇ ଗଠିତ ଖଣ୍ଡପୀଠ କହିଛନ୍ତି ଯେ ଏହି ମାମଲାର ତଦନ୍ତ ବିଗତ ଅନେକ ବର୍ଷ ଧରି ଚାଲିଛି । ଏପରି ଏକ ଗୁରୁତ୍ବପୁର୍ଣ୍ଣ ମାମଲାର ତଦନ୍ତ କାହିଁକି ଶେଷ ହୋଇପାରୁନାହିଁ ସେ ବିଷୟରେ ଦେଶର ଜନସାଧାରଣ ଜାଣିବାକୁ ଚାହୁଁଛନ୍ତି ବୋଲି ଅଦାଲତ କହିଛନ୍ତି। ଏନେଇ ଦେଶ ବାସୀଙ୍କୁ ଅନ୍ଧାରରେ ରଖାଯାଇ ପାରିବ ନାହିଁ ବୋଲି ନ୍ୟାୟାଳୟ କହିଛନ୍ତି। ତଦନ୍ତ ପ୍ରକ୍ରିୟାରେ କିଏ ବାଧା ସୃଷ୍ଟି କରୁଛି ସେ ନେଇ ଅଦାଲତ ପ୍ରଶ୍ନ ଉଠାଇଛନ୍ତି।
ମାମଲାର ପରବର୍ତ୍ତୀ ଶୁଣାଣୀ ପାଇଁ ଅପ୍ରେଲ ୩ ତାରିଖକୁ ଦିନ ଧାର୍ଯ୍ୟ କରାଯାଇଛି।