ନୂଆଦିଲ୍ଲୀ : ବରିଷ୍ଠ ଅଭିନେତ୍ରୀ ତଥା ରାଜନେତ୍ରୀ ଜୟାପ୍ରଦା ଶନିବାର ସମାଜବାଦୀ ପାର୍ଟି (ଏସ୍ପି)ର ବରିଷ୍ଠ ନେତା ମହମ୍ମଦ ଆଜମ୍ ଖାନ୍ଙ୍କୁ ବଲିଉଡ୍ ଚଳଚ୍ଚିତ୍ର ‘ପଦ୍ମାବତ୍’ର ଆଲ୍ଲାଉଦ୍ଦିନ ଖିଲଜୀଙ୍କ ସହିତ ତୁଳନା କରିଛନ୍ତି। ସେ କହିଛନ୍ତି, ୨୦୦୯ରେ ଉତ୍ତର ପ୍ରଦେଶର ରାମପୁରରୁ ପୁନଃ ନିର୍ବାଚନ ଲଢିବା ବେଳେ ଆଜମ୍ ତାଙ୍କୁ ହଇରାଣ କରିଥିଲେ। ଏପରିକି ତାଙ୍କ ଭାବମୂର୍ତ୍ତିର୍ ମଳିନ କରିବାକୁ ଆଜମ ନାନା ଉଦ୍ୟମ କରିଥିଲେ। ‘ପଦ୍ମାବତ୍’ ଚଳଚ୍ଚିତ୍ର ଦେଖିବା ବେଳେ ଖିଲିଜୀଙ୍କ ଚରିତ୍ର ତାଙ୍କୁ ଆଜମ୍ଙ୍କ କଥା ସ୍ମରଣ କରାଇଦେଇଥିଲା ବୋଲି ଜୟା କହିଛନ୍ତି। ଆଜମ୍ ତାଙ୍କର ଆପତ୍ତିଜନକ ଫଟୋ ଏବଂ ଜାଲିଆତି କରାଯାଇଥିବା ଭିଡିଓ ବାଣ୍ଟୁଥିବା ନେଇ ପୂର୍ବରୁ ମଧ୍ୟ ଜୟା ଅଭିଯୋଗ ଆଣିଥିଲେ। ଏ ନେଇ ନିର୍ବାଚନ କମିଶନଙ୍କ ନିକଟରେ ଅଭିଯୋଗ କରିବାକୁ ସେ ସେତେବେଳେ ଚେତାବନୀ ଦେଇଥିଲେ। ଉକ୍ତ ନିର୍ବାଚନରେ ଜୟା ବିଜୟଲାଭ କରିଥିଲେ ମଧ୍ୟ ଦଳବିରୋଧୀ କାର୍ଯ୍ୟ ଅଭିଯୋଗରେ ତାଙ୍କୁ ଏସ୍ପିରୁ ବହିଷ୍କୃତ କରାଯାଇଥିଲା।
